Inaprobaran ken inruaren ni Department of Budget and Management (DBM) Secretary Amenah F. Pangandaman ti PhP875 a milion a pangpunno iti Quick Response Fund (QRF) ti Department of Social Welfare and Development (DSWD) tapno masigurado ti naintiempuan a panangsaranay para kadagiti pamilia a naapektaran iti bagyo.
Segun iti report idi Oktubre 30, bimmaban iti 50 a porsiento ti pondo ti QRF, ket PhP557.77 a milion laengen ti natda, a mangbukel iti 31.87 a porsiento ti agdama a badiet daytoy.
Kinuna ti DBM itay Nobiembre 14 a maala ti pondo manipud iti National Disaster Risk Reduction and Management (NDRRM) Fund a nailanad iti 2024 General Appropriations Act (GAA).
Maibatay iti 2024 GAA, mabalin nga usaren ti NDRRM Fund kas nayon a pangalaan iti pondo para iti QRF ti maseknan nga ahensia no nababbbaban iti 50 a porsiento daytoy, no la ketdi anamongan ti DBM.
Kiddaw ni Quiboloy a Medical Furlough, inanamongan ti Pasig RTC
Kinuna ti DBM a napateg ti kiddaw ti DSWD tapno masigurado ti naintiempuan a pannakaipaay iti tulong ken dadduma pay a serbisio iti sidong ti Disaster Response and Management Program. (Derco Rosal/Manila Bulletin//Lito Hilidon/Bannawag)
