Binallaagan ti Land Transportation Franchising and Regulatory Board (LTFRB) dagiti kompania ti bus a dida koma singiren dagiti pasahero nga agusar iti kasilia kadagiti terminalda, ta masapul a libre nga usaren dagiti sanitary facilities, maibatay iti agdama a pagannurotan.
Daytoy ti impakaammo ni daulo ti LTFRB Teofilo Guadiz III a natakuatanda kalpasan ti inwayatda a kellaat nga inspeksion kadagiti terminal ti bus iti Metro Manila, a singsingirenda iti PhP5 dagiti pasahero nga agusar iti kasiliada.
Segun ken ni Guadiz, maiparit ti agpabayad iti panagusar iti kasilia iti amin nga estasion ti bus.
Nabayagen nga ar-aramiden daytoy dagiti estasion ti bus a kasla gagangay laengen a maar-aramid gapu iti saan a panangipatungpal ti gobierno iti daytoy a linteg.
Kiddaw ni Quiboloy a Medical Furlough, inanamongan ti Pasig RTC
Malaksid iti libre a panagusar iti kasilia, masapul nga maaddaan dagiti estasion ti bus iti priority/express lanes ken lamisaan a pagsukatan iti lampin iti uneg ti kasilia iti estasion ti bus.
Masapul a maaddaan met dagiti estasion ti lugan iti Global Navigation Satellite System (GNSS), Closed-Circuit Television (CCTV) nga agtultuloy ti panangirekordna iti napalabas a 72 nga oras, agraman ti fire extinguisher kadagiti lugan ken iti uneg ti estasion.
Binilin pay ni Guadiz dagiti opereytor ti terminal a mangikabilda iti metal detector wenno handheld metal detector. (Aaron Recuenco/Manila Bulletin//Lito Hilidon/Bannawag)
