Saanen a super typhoon no di ket maysa laengen a typhoon ni Ofel kalpasan a nag-landfall daytoy iti Baggao, Cagayan itay 1:30 PM ita nga aldaw, segun iti Philippine Atmospheric, Geophysical and Astronomical Services Administration (PAGASA). Nupay kasta napigsa pay laeng daytoy iti anginna a 175 kph iti asideg ti tengngana ket iti pugsona a 240 kph.
Iti pakdaar ti PAGASA a nairuar itay alas dos ti malem, Nob. 14, inikkaten ti PAGASA ti Signal No. 5, ngem nakatalinaed a Signal No. 4 iti Babuyan Islands, umamianan ken dumaya a paspaset ti mainland Cagayan (Santa Teresita, Ballesteros, Aparri, Camalaniugan, Buguey, Lal-Lo, Allacapan, Gattaran, Baggao, Peñablanca) ken iti umamianan a daya nga Isabela (Maconacon, Divilacan, Palanan).
Nakabayog met ti Signal No. 3 iti Batanes, dadduma pay a paset ti Cagayan, umamianan ken tengnga ken dumaya a paspaset ti Isabela (San Pablo, Delfin Albano, Ilagan City, Tumauini, Cabagan, Santa Maria, Santo Tomas, San Mariano, Palanan), umamianan nga Apayao (Flora, Santa Marcela, Luna, Pudtol, Calanasan, Kabugao), ken kadagiti umamianan a paset ti Ilocos Norte (Pagudpud, Adams, Dumalneg).
Signal No. 2 met kadagiti lumaud ken umabagatan a paset ti Isabela (Quezon, Quirino, Mallig, San Manuel, Aurora, Cabatuan, City of Cauayan, Benito Soliven, Naguilian, Gamu, Burgos, Reina Mercedes, Luna, Roxas, Angadanan, Alicia, San Guillermo, Echague, Jones, San Agustin, San Mateo, San Isidro), iti umamianan a daya a paset ti Quirino (Maddela), dadduma pay a paset ti Apayao, Kalinga, umamianan a daya a paset ti Abra (Tineg, Lacub, Malibcong, Lagayan, San Juan, Lagangilang, Licuan-Baay, Daguioman), dumaya a Mountain Province (Paracelis), dumaya nga Ifugao (Alfonso Lista), ken iti dadduma pay a paset ti Ilocos Norte.
Kiddaw ni Quiboloy a Medical Furlough, inanamongan ti Pasig RTC
Dagiti lugar nga adda iti babaen ti Signal No. 1: dadduma pay a paset ti Isabela, Quirino, Nueva Vizcaya, dadduma pay a paset ti Mountain Province, dadduma pay a paset ti Ifugao, dadduma pay a paset ti Abra, umamianan a Benguet (Bokod, Mankayan, Kapangan, Atok, Kabayan, Kibungan, Bakun, Buguias, Tublay), Ilocos Sur, umamianan a paset ti La Union (Luna, Sudipen, Bangar, Santol, San Gabriel, Bagulin, Bacnotan, Balaoan, San Juan), ken umamianan nga Aurora (Casiguran, Dinalungan, Dipaculao, Baler, Dilasag, Maria Aurora).
Kalpasan a maka-landfall, itultuloy ni Ofel ti aggunay nga agturong iti umamianan a daya a paset ti mainland Luzon kadagiti sumaruno nga oras. Mabalin nga ag-landfall manen daytoy iti Babuyan Islands.
Napipigsa met a tudo (nasurok a 200 milimetro) ti mabalin nga agtultuloy nga ibuyatna iti Cagayan ken Isabela iti sumaruno a 24 nga oras.
Agtudo met latta iti napigsa, 100 agingga 200 milimetro, iti Batanes, Ilocos Norte, Apayao, Kalinga, Mountain Province, Quirino, ken Aurora, idinto a 50 agingga 100 milimetro ti itudona iti Abra, Ifugao, ken Nueva Vizcaya.
Namakdaar ti PAGASA a kadagitoy a kapigsa ti tudo, mabalin a mangitunda kadagiti panaglayus ken landslides, nangruna kadagiti luglugar a siguden a malaylayus ken adda panagreggay ti daga. (Ellalyn De Vera-Ruiz/MB)
