Indagadag ti Second Congressional Commission on Education (EDCOM 2) iti Department of Education (DepEd) a tamingen koma ti ahensia ti kinaawan ti nalawag nga annuroten para iti anti-bullying iti nasurok a 10,000 a pagadalan iti entero a pagilian, tapno masigurado ti pannakaipaay iti natalged ken natalingenngen a kasasaad dagiti agad-adal.
Iti naangay a bista ti Committee on Basic Education ti Kamara nga indauluan ti Second Congressional Commission on Education (EDCOM 2) itay Nobiembre 13, dinakamatda ti kasasaad ti anti-bullying policies ti DepEd.
Segun kadagiti opisial ti DepEd, 10,018 a para iti publiko a pagadalan ti agkurang ti localized bullying policy, nupay kasapulan daytoy segun iti Republic Act 10627.
Segun iti datos ti Trends in International Mathematics and Science Study (TIMSS), dagiti adalan iti Grado 4 a nakapadas iti bullying ket nababa ti naalada iti math ken science, idinto a nangatngato ti naala dagiti saan a nakapadas iti bullying.
Kiddaw ni Quiboloy a Medical Furlough, inanamongan ti Pasig RTC
Impalnaad met dagiti nadumaduma nga internasional a panangtingiting kas iti Programme for International Student Assessment (PISA) ken ti Southeast Asia Primary Learning Metrics (SEA-PLM), a ti Filipinas ti kaaduan iti kaso ti bullying.
Inlawlawag ni Co-Chairperson ti EDCOM2 Diputado Roman Romulo a maysa kadagiti parikut ti Komision ti agkurkurang a guidance counselor.
Insingasing ni Romulo a masapul a marepaso ti IRR ti DepEd (wenno ti DepEd Order No. 55, series of 2013) maibatay iti pannakiumanda kadagiti mannursuro, nagannak ken estudiante iti entero a pagilian.
Mairaman iti panagbalbaliw ti pannakailawlawag ti nadumaduma a kita ti bullying ken dagiti maiparit nga aramid a mainaig kadagitoy; ti pannakasigurado a maaddaan ti tunggal pagadalan iti annuroten kontra iti bullying; pannakaipasdek ti Learner Rights Protection Office; panagsanay dagiti guidance designates, mannursuro, nagannak, ken adalan a mangpalawa iti pannakaammoda mainaig iti bullying; ken ti pannakaipaay iti pondo tapno maipatungpal dagiti program ti pagadalan kontra iti bullying. (Merlina Hernando-Malipot/Manila Bulletin//Lito Hilidon/Bannawag)
