Maekspektar ti iseserrek ti tropical storm a 'Man-Yi' iti Philippine Area of Responsibility (PAR) ita a rabii ti Huebes, Nob. 14, ket maawagan a kas “Pepito”, ti maika-16 a tropical cyclone a mangduprak iti Filipinas ita a tawen ken maika-6 iti las-ud laeng ti makabulan.
Ingganetget ti Office of Civil Defense (OCD) ti panagsagana ti publiko ta maekspektar a mangyeg iti napipigsa a tudo ni "Pepito" malaksid pay iti napigsa nga angin. Addan daytoy 1,965 a kilometro iti daya ti Eastern Visayas.
Kinuna met ti PAGASA a nadanonen ti bagyo nga “Ofel” ti maximum sustained winds a 150 kph iti asideg ti tengngana ken pegges nga umabot iti 185 kph isu a mabalin a maibayog ti Signal No. 4 iti amianan a daya a paset ti Cagayan ken mabalin a maibayog pay iti Signal No. 5 no agtultuloy ti ipipigsa ti bagyo. (MANILA BULLETIN)
