Napigsa a tudo ti yeg ni Bagyo Pepito (internasional a nagan: Man-yi) iti sumagmamano a lugar iti Luzon ken Eastern Visayas itoy a ngudo ti lawas, segun iti Philippine Atmospheric, Geophysical and Astronomical Services Administration (PAGASA) ita nga aldaw, Nobiembre 15.
Kinuna ni Weather Specialist ti PAGASA Daniel James Villamil a mabalin a mungrugi ti napigsa a tudo inton Sabado (Nob. 16) gapu ta pumigsa pay ti bagyo iti yaasidegna iti daga.
Manamnama a mapasaran ti Catanduanes ti napigsa agingga iti nakaro a bayakabak a mabalin a mangpataud iti layos.
Napigsa a bayakabak ti masagrap ti Northern Samar, Eastern Samar, Camarines Sur, Albay, ken Sorsogon, a mabalin a mangpataud iti layos kadagiti nababa a lugar wenno asideg iti karayan.
Kiddaw ni Quiboloy a Medical Furlough, inanamongan ti Pasig RTC
Kalalainganna agingga napigsa a bayakabak ti marikna iti Camarines Norte, Masbate, Leyte, Quezon, Samar, ken Biliran a managpataud iti panaglayos wenno reggaay.
Bayat ti yaasideg ni Pepito iti daga inton Domingo, ad-adu pay a lugar ti agsagrap iti napigsa a bayakabak kas iti Marinduque, Laguna, Rizal, Bulacan, and Nueva Ecija.
Kalalainganna agingga napigsa a bayakabak ti umay iti Metro Manila, Bataan, Cavite, Zambales, Tarlac, Batangas, Pampanga, Masbate, Romblon, Eastern Samar, Samar, Oriental Mindoro, Pangasinan, Nueva Vizcaya, ken Quirino.
Segun iti PAGASA, naibayog iti Signal No. 1 iti Catanduanes, daya a paset ti Camarines Norte, ti daya a paset ti Camarines Sur, daya a paset ti Albay, daya ken laud a paset ti Sorsogon, Northern Samar, amianan a paset ti Eastern Samar, ken amianan a daya a paset ti Samar. (Ellalyn De Vera-Ruiz/Manila Bulletin//Lito Hilidon/Bannawag)
