Impakita ti gobierno ti Canada ken France ti interesda a mangted iti suporta tapno maipatungpal ti panggep ti Filipinas nga agaramat iti nuklear nga enerhia.
Iti naangay a Philippine International Nuclear Supply Chain Forum 2024, dinakamat ni Embahador ti Canada David Hartman ti komprehensibo a nuclear ecosystem, agraman dagiti napasayaat a reactor technology ken pinansial a solusion babaen ti Export Development Canada.
Ti Canada, a maysa kadagiti addaan iti kadakkelan a uranium reserve iti lubong ken maikadua a kadakkelan nga agpatpataud iti nuclear fuel, ti addaan iti kapabilidad a tumulong iti Filipinas a mangragpat iti tarigagayna a nuklear nga enerhia.
Gandat ti Philippine Energy Plan a mangipatakder iti 1,200 megawatts (MW) a kapasidad ti nuclear energy iti las-ud ti walo a tawen, a maingato iti 2,400 MW iti 2035 ken maragpat ti 4,800 MW inton 2050.
Kiddaw ni Quiboloy a Medical Furlough, inanamongan ti Pasig RTC
Daytoy in-inut a panangpadakkel iti kapasidad nuklear ket maitunos iti tarigagay ti Filipinas a maaddaan iti naan-anay a suplay ti enerhia, pannakapadur-as ti ekonomia, ken tulongna iti pannakatengngel ti agtultuloy nga ibabara ti lubong a mangibungbunga iti panagbaliw ti klima.
Inyebkas met ti France ti panangsuportarna iti nuclear energy program ti Filipinas.
Kinuna ni Embahador ti France Marie Fontanel a maar-aramiden ti panagpatang ti Department of Energy (DOE) ken ti French Ministry for Ecological Transition, Energy, Climate and Risk Education mainaig iti maysa a Memorandum of Understanding (MOU) a mangpalubos iti panagtinnulong iti panagbaliw iti enerhia ken pannakaipatungpal iti nuclear program, a mangipamaysa iti panagsanay, panagsirarak, ken panangpabileg iti kapasidad.
Pampanunoten pay ti gobierno ti France ti panangipaayna iti pondo a mangsuportar kadagiti panagadal kadagiti posible a lugar a pangipatakderan iti nuklear nga impraestruktura.
Impaganetget ni Sekretario ti Technical Education and Skills Development Authority (TESDA) Jose Francisco Benitez a kasapulan unay ti kualipikado a puersa ti panagtrabaho tapno agballigi ti programa a nuklear nga enerhia.
Inyebkas ni Benitez ti panagtalekna iti pannakiasmang ti Filipinas iti Canada ken France iti panagsanay ken panangisuro kadagiti agpaay iti nuclear sector ti pagilian. (Gabriell Cbristel Galang/Manila Bulletin//Lito Hilidon/Bannawag)
