Inwayat ti Department of Agriculture (DA) ti temporario a pannakaiparit ti panagangkat kadagiti produkto a manok ken kadagiti domestiko ken atap a billit manipud iti Japan ken Austria gapu iti panagraira ti Highly Pathogenic Avian Influenza (HPAI) kadagititoy a pagilian.
Segun iti DA, mairaman iti import ban ti sadiwa a karne ti manok, 1-day old a piek, ken semilia para iti artipisial nga inseminasion dagiti upa (manok).
Kinuna ni Agriculture Secretary Francisco Tiu Laurel Jr., iti impaulogna a memorandum order, a kasapulan ti temporario a restriksion tapno masalakniban ti industria ti manok ti Filipinas manipud kadagiti pangta iti salun-at dagiti ayup a mabalin a mamagpeggad iti seguridad ti taraon.
Innayon pay ni Laurel a “maysa a major investment ken kangrunaan a panggedan ti industria ti manok.”
Kiddaw ni Quiboloy a Medical Furlough, inanamongan ti Pasig RTC
Opisial a naireport iti World Organization for Animal Health (WOAH) dagiti panagraira ti HPAI. Pinasingkedan met ti Ministry of Agriculture, Forestry and Fisheries ti Japan ti panagraira ti H5 subtype bird flu idiay Atsuma, Hokkaido, a napasamak idi Oktubre 16.
Naipadamag met ti panagraira ti H5N1 idiay Mattighofen, Braunau am Inn, Oberosterreich, iti Austria, a pinasingkedan ti Austrian Agency for Health and Food Safety idi Oktubre 7. (Jel Santos/MANILA BULETTIN)
