Indauluan ni Presidente Ferdinand Marcos Jr. (PBBM) ti panaglukat ti Light Rail Transit Line 1 (LRT-1) Cavite Extension Project (L1CE) Phase 1, a mangpapardas iti biahe iti Metro Manila ken mangipasimudaag iti pannakapabaro ti sistema ti transportasion iti Filipinas.
Iti panagbitlana itay Nobiembre 15, kinuna ni PBBM a dagiti nainayon nga estasion -- ti Redemptorist-ASEANA, MIA Road, Parañaque Integrated Terminal Exchange (PITX), Ninoy Aquino Avenue, ken Dr. Santos -- ket agpaay a napateg a pagserkan ti nakaad-adu unay a pasahero iti Metro Manila, Cavite, ken iti kabangibang a lugar.
Agarup 80,000 a pasahero ti mainayon iti nasurok a 320,000 a katao nga inaldaw nga agluglugan iti LRT-1.
Kinuna ni PBBM a maluktanen ti L1CE Phase 1 manipud 5:00 iti parbangon inton Sabado (Nob. 16).
Kiddaw ni Quiboloy a Medical Furlough, inanamongan ti Pasig RTC
Gapu iti lima nga estasion ti LRT-1 manayonan iti innem a kilometro ti linia ti tren, ket agbalinen a 26 a kilometro. Makissayan met iti 30 a minuto ti panagbiahe manipud iti Baclaran iti Siudad ti Parañaque agingga iti Bacoor, Cavite.
Ti L1CE Phase 1 ti umuna a railway project a nairingpas ti administrason ni Marcos babaen ti public-private partnership (PPP).
Sumagmamano pay a railway project ti isaysayangkat ti gobierno kas iti Unified Grand Central Station, ti Metro Manila Subway Project, the MRT-7, ti North-South Commuter Railway, ti MRT-4, ken ti Philippine National Railways South Long Haul. (Argyll Cyrus Geducos/Manila Bulletin//Lito Hilidon/Bannawag)
