Nagballaag ti Philippine Atmospheric, Geophysical and Astronomical Services Administration (PAGASA) ita nga aldaw, Nobiembre 15, iti publiko a napeggad unay ti Bagyo Pepito (internasional a nagan: Man-yi).

Segun iti administrador ti PAGASA a ni Nathaniel Servando, kritikal ti sumaruno a 24 nga oras, ta nakaparpardas ti bagyo iti 30 a kilometro tunggal oras ket napeggad unay daytoy.

Addaan ni Pepito iti kapigsa a 130 a kilometro tunggal oras iti asideg ti sentrona ken pugso nga agingga iti 160 a kilometro tunggal oras. Posible a pumigsa pay daytoy ket agbalin a "Super Typhoon" sakbay nga agdisso iti daga inton Sabado ti rabii wenno agsapa ti Domingo.

Iti Barangay Binanuahan ken Marinawa, Bato, Catanduanes, isangsang-at dagiti mangngalap ti bilogda kas panagsagana iti yaay ni Bagyo Pepito inton Sabado (Nob. 16). (Pammadayaw ti PNA)

Nasaripatpatan ni Pepito iti 630 a kilometro iti daya ti Guiuan, Eastern Samar itay 10:00 ti agsapa.

Nasional

Kiddaw ni Quiboloy a Medical Furlough, inanamongan ti Pasig RTC

Kinuna ni Servando a napigsa a bayakabak ti yeg ni Pepito a mangpataud iti layos, reggaay, ken storm surge.

Innayon ni Servando a mabalin a maapektaran ti Eastern Visayas, Bicol Region, Central Luzon, ken Quezon.

Kas panagsagana ti probinsia iti idadateng ni Bagyo Pepito, maipatpatungpalen ti mandatory evacuation iti Buhi, Camarines Sur ita, Nobiembre 15. (Pammadayaw ti PNA)

Naibayog ti Tropical Cyclone Wind Signal (TCWS) No. 2 iti daya a paset ti Northern Samar (Mapanas, Gamay, Palapag, Lapinig), ken ti amianan a paset ti Eastern Samar (Arteche, Oras, San Policarpo, Dolores, Jipapad, Maslog).

Adda iti TCWS No. 1 dagiti lugar iti abagatan a daya a paset ti Quezon, Camarines Norte, Camarines Sur, Catanduanes, Albay, Sorsogon, Masbate, ti dadduma a paset ti Northern Samar, ti dadduma a paset ti Eastern Samar, Samar, ken Biliran. (Ma. Cristina Arayata/Manila Bulletin//Lito Hilidon/Bannawag)