Impakdaar ti Philippine Atmospheric, Geophysical and Astronomical Services Administration (PAGASA) itay Nobiembre 14 a posible nga agbalin a "Super Typhoon" ni Bagyo Pepito (internasional a nagan: Man-yi) sakbay nga agdisso iti Central Luzon iti ngudo ti lawas.
Itay 11:00 ti rabii (Nob. 14), nasaripatpatan ti sentro ni PEpito iti 945 a kilometro iti daya ti Eastern Visayas, nga addaan iti kapigsa a 100 a kilometro tunggal oras iti asideg ti sentrona ken pugso a dumanon iti 125 a kilometro tunggal oras.
Kinuna ti PAGASA a posible nga agbalin a naan-anay a bagyo ni Pepito ita nga aldaw (Nob. 15), ket agbalin a super typhoon inton Sabado (Nob. 16) ti malem wenno rabii, sakbay nga agdisso iti daga.
Ngem kumapsut ti bagyo apaman nga agdisso iti daga inton Domingo ti rabii kalpasan a tuparenna ti daga ken rummuar iti Filipinas inton Lunes (Nob. 18 ).
Kiddaw ni Quiboloy a Medical Furlough, inanamongan ti Pasig RTC
Kinuna ni PAGASA a saan pay a masigurado ti eksakto a pagdissuan ti bagyo, ta mabalin nga agbaliw ti turongen daytoy, nangruna iti maikatlo wenno maikapat nga aldaw.
Nupay kasta, imballaag ti PAGASA a yeg ni Pepito ti napigsa a bayakabak, napigsa nga angin, ken storm surge kadagit lugar iti Luzon ken Eastern Visayas.
Itay Huebes, naibayog iti Signal No. 1 ti Catanduanes, daya a paset ti Camarines Sur (Caramoan, Garchitorena, Presentacion, San Jose, Lagonoy), daya a paset ti Albay (Rapu-Rapu, City of Tabaco, Malilipot, Santo Domingo, Bacacay, Legazpi City, Malinao, Manito, Tiwi), daya ken abagatan a paset ti Sorsogon (Juban, City of Sorsogon, Barcelona, Bulusan, Magallanes, Gubat, Santa Magdalena, Casiguran, Bulan, Irosin, Matnog, Prieto Diaz), Northern Samar, amianan a paset ti Eastern Samar (San Policarpo, Arteche, Jipapad, Maslog, Dolores, Oras), ken amianan a daya a paset ti Samar (Matuguinao, San Jose de Buan).
Innayon ti PAGASA a mabalin a maibayog ti pakdaar agingga iti Signal No. 5 iti panaglabas ni Pepito. (Ellalyn De Vera-Ruiz/Manila Bulletin//Lito Hilidon/Bannawag)
