Agdagup iti 1.3 a milion a family food packs (FFP) ti lebben wenno adda ita iti ikut ti Department of Social Welfare and Development (DSWD) a pangnayon iti kasapulan dagiti local government units (LGUs) a lumunglung-aw pay laeng kalpasan nga inapektaran ida dagiti napalabas a bagyo, ken dagiti posible a maapektaran ni Bagyo Pepito (internasional a nagan: Man-yi).
Daytoy ti impakaammo ni Sekretario ti DSWD Rex Gatchalian iti maysa a taripnong a naangay iti opisina ti National Disaster Risk Reduction and Management Council (NDRRMC) iti Camp Aguinaldo itay Nobiembre 15, Biernes.
Segun ken ni Gatchalian, saanda a kissayan ti 1.3 a lebben ti DSWD iti entero a pagilian, ta dua ti mabalin a pangalaanda iti suplay: ti umuna, dagiti aggapu iti National Resource Operations Center (NROC) ti DSWD iti Siudad ti Pasay, iti Visayas Disaster Resource Center iti Cebu, ken nadumaduma a bodega ti 16 nga opisina ti DSWD; ket ti maikadua, aggapu kadagiti ipaay ti pribado sektor babaen ti pannakitinnulong ti ahensia.
Kinuna ni Gatchalian a gandat ti DSWD a paaduen ti isaganada nga FFP iti 50,000 agingga iti 80,000 tapno saanda a maibusan iti suplay.
Kiddaw ni Quiboloy a Medical Furlough, inanamongan ti Pasig RTC
Impasigurado ni Gatchalian a babaen daytoy, kabaelan ti DSWD ti mangisagana iti 1 a milion nga FFP agingga iti Disiembre 7, kas nayon iti agdama a bilang a 1.3 a milion nga FFP. (PNA//Lito Hilidon/Bannawag)
