Manipud iti panag-scroll iti TikTok agingga iti panaggatang iti Shopee, agparparang a kaay-ayo dagiti Filipino dagiti Chinese apps. Maibatay iti panagadal, ti Filipinas ti maysa kadagiti global hotspot para kadagitoy nga apps, a nangpataud kadagiti saludsod nga agpadpada maipapan kadagiti pagimbagan ken mabalin a peggad nga ibunga daytoy a digital revolution.
Impakita ti nabiit pay a panagadal ti Adjust ken Sensor Tower a "Chinese Export Apps" no kasano ti kasaknap dagitoy nga apps iti inaldaw a panagbiag iti rehion, partikular iti Filipinas, a ditoy, 21 a porsiento kadagiti amin nga app install ket inaramid dagiti Intsik. Gapu met iti daytoy, insaadna ti pagilian kadagiti kangrunaan a merkado iti sangalubongan para kadagiti Chinese apps.
Intampok ti panagadal dagiti nadumaduma a wagas a panangbaliw dagiti Chinese apps iti padas dagiti agus-usar babaen ti gamification, AI, ken personalized content. Manipud iti paglinglingayan ken social media agingga iti pinansial ken utilities, tamingen dagitoy nga apps dagiti nadumaduma a kasapulan ken paggugusto nga aramiden dagiti tattao. Iti Filipinas, mairaman kadagiti kangrunaan a maar-aramat ditoy dagiti nalatak nga apps ti China a kas iti TikTok, Shopee, ken SHAREit.
Saan laeng met ketdi a ti Filipinas ti ”nangarakup” kadagiti Chinese apps no di pay ketdi ti sibubukel a Southeast Asia. Kaaduanna nga agus-usar iti utility app ti Vietnam, Cambodia, ken Indonesia; idauluan met ti Singapore dagiti agus-usar iti entertainment app. Iti sektor ti gaming, ti South Korea ti dadaulo, sumarsaruno ti Filipinas ken Indonesia.
Resolusion ti UN nga agkidkiddaw ti ceasefire iti Gaza, saan a pinaboran ti Estados Unidos
Iti met sektor ti social apps, numero uno iti kaaduan iti installs iti Malaysia iti sangalubongan; sumaruno ti Indonesia, Vietnam, sa ti Filipinas.
Impalgak ti panagadal nga iti Southeast Asia, nairekord ti dakkel a panagdur-as dagiti apps iti finance ken shopping. Iti maikatlo a kuarter ti 2024, ngimmato iti 88 a porsiento ti installs kadagiti finance apps iti tinawen, nga immadu iti 70 a porsiento ti pannakausar ti session. Kabayatanna, nakairekord dagiti shopping app install iti naisangsangayan a 184 a porsiento a yaadu; nupay kasta, bimmaba ti oras ti sesion iti 18 a porsiento.
Iti laksid ti yaadu dagiti Chinese apps, agtultuloy met dagiti pakaseknan wenno pagdandanagan. Agtalinaed a napateg nga isyu ti kinapribado ti datos, nangruna gapu kadagiti linteg iti nasional a seguridad ti China, a mabalin a mangpilit kadagiti kompania a mangibinglay iti datos dagiti agus-usar iti gobierno. Daytoy ti nangpataud iti danag iti sangalubongan, agraman iti Filipinas, maipapan iti mabalin a di umisu a pannakausar ti personal nga impormasion a naurnong dagitoy nga aplikasion.
Maysa a marketing professional iti Manila, a kayatna a maawagan iti Carlos, ti agkuna nga inaldaw nga agus-usar kadagiti Chinese apps a kas iti Shopee, ken TikTok. Nupay kasta, dagiti nabiit pay a damag maipapan iti kinapribado ti datos ti nangpataud kadagiti pakaseknanna maipapan iti posibilidad a ti impormasionna ket ma-access ti gobierno ti China. "Diak napanunot no sadino ti pappapanan ti impormasion maipanggep kaniak,” inaminna.
Gapu ta saan pay met a nakasagana a mang-delete kadagiti apps, ad-adda a nagbalin a naannad babaen ti panangsukimatna kadagiti pammalubos ti app ken pananglimitarna iti impormasion nga ibinglayna.
Ngem iti laksid dagitoy a pakaseknan, kasla naraniag ti masakbayan dagiti Chinese apps iti Pilipinas ken Southeast Asia.
Para kadagiti Intsik a developer, napateg kadakuada ti pannakaawatda kadagiti kultura ti rehion para iti agtultuloy a balligida. Ti panaggaraw iti labes ti simple a panagipatarus ti pagsasao tapno arakupen ti "kulturalisasion" – panangraem kadagiti puli, panangtaming kadagiti rehional a kasapulan, ken pannakaitandudo dagiti kultural nga elemento – dagitoy ti agbalin a tulbek iti panangbangonda iti panagtalek dagiti agar-aramat kadagiti Chinese apps.
