Gapu ta umad-adu dagiti napigsa a bagyo, idagdagadag ni Diputado ti Camarines Sur 2nd district LRay Villafuerte iti gobierno a mangipasdek kadagiti natibker a mega evacuation centers (ECs) a pagkamangan ti adu a tao a maipanaw kadagiti pagtaenganda.
Kinuna ni Villafuerte a panawenen a makipagtrabaho ti nailian a gobierno kadagiti LGU (local government units) tapno maipatakder ti permanente, naandur ken kompleto kadagiti alikamenna a mega evacuation center (EC) iti nangato a lugar tapno masigurado a maaddaan iti natalged ken kompleto a pagkamangan dagiti agbakuit no kasta nga adda bagyo wenno ania man a didigra.
Segun ken ni Villafuerte, mabalin a maaramid daytoy iti mabiit ta iliplippasen ti dua a paset ti Kongreso ti gakat a “Ligtas Pinoy Centers Act” a maidatag ken ni Presidente Marcos, tapno mabangon ti permanente nga EC iti amin a siudad ken ili iti pagilian.
Maibatay iti gakat a “Ligtas Pinoy Centers Act,” dagiti maaramid nga EC ket masapul a naandur iti kalamidad, addaan natibker a materiales, ken maitunos iti Republic Act (RA) No. 6541, wenno ti National Building Code of 1972, wenno iti estandarte ti International Building Code.
Kiddaw ni Quiboloy a Medical Furlough, inanamongan ti Pasig RTC
Namnamaen ni Villafuerte nga iti gakat a maidatag ken pirmaanto ti Presidente ket aglaon iti probision ti HB No.7354 a mangted kadagiti ehekutibo ti LGU iti karbengan a mangikeddeng iti pakaipatakderan ti permanente a pagbakuitan iti lugarda, agraman ti panangimaton iti daytoy. (Ellson Quismorio/Manila Bulletin//Lito Hilidon/Bannawag)
