Nangipaulog ti Philippine Institute of Volcanology and Seismology (Phivolcs) itay Nobiembre 15 iti pakdaar iti panagayus ti lahar manipud iti tallo nga aktibo a bulkan - Mayon, Pinatubo, ken Taal - gapu iti manamnama a napigsa a bayakabak a yeg ni Bagyo Pepito, a manamnama nga agdisso iti daya a baybay ti Southern Luzon iti baet ti Nob. 16 ken 17.
Segun iti Phivolcs, mabalin nga agayus ti lahar manipud iti Bulkan Mayon kadagiti kabalbalayan iti Miisi, Mabinit, Binaan, Buyuan, Anoling, Quirangay, Maninila, Masarawag, Muladbucad, Nasisi, Mabinit, Matanag, Basud, ken Bulawan channels iti Albay.
Adda met pangta ti lahar kadagiti lugar nga asideg iti Bulkan Pinatubo kas iti San Marcelino, San Narciso, San Felipe, ken Botolan iti Zambales babaen ti Sto. Tomas-Marella ken Bucao River systems. Posible a maapektaran ti Tarlac ken Pampanga iti lahar nga aggapu iti O'Donnell ken Pasig-Potrero River system.
Maapektaran dagiti lugar iti Agoncillo, Laurel, ken Talisay iti Batangas no agayus ti lahar manipud iti Bulkan Taal.
Kiddaw ni Quiboloy a Medical Furlough, inanamongan ti Pasig RTC
Imbalakad ti Phivolcs nga agridam ken agsagana koma dagiti agindeg iti asideg ti bulkan ta mabalin a mangparnuay iti lahar ti napigsa a tudo a yeg ni Bagyo Pepito. (Ellalyn De Vera-Ruiz/Manila Bulletin//Lito Hilidon/Bannawag)
