Ni dati a presidente Rodrigo Duterte iti itatabunona iti quad-committee hearing a kaduana ni dati a senador Leila de Lima, Fr. Flavie Villanueva, ken dati a senador Antonio Trillanes IV idi Nob. 13, 2024. (Ladawan: House of Representatives)

"Am-amangaw" laeng ti ibagbaga ni dati a presidente Rodrigo Duterte a ti Malakanyang ti adda iti likudan ti panangatakar kenkuana ni dati a senador Antonio Trillanes IV iti quad-committee hearing iti Kongreso idi Nob. 13.

Dayta ti kinuna ni Executive Secretary Lucas Bersamin iti interbiu kenkuana ti media ita a Lunes, Nob. 18.

"Ammoyo, narigat a patolan dayta kasta ta am-ammangaw laeng dayta," imbatad ni Bersamin.

Iti pannakipatang ni Duterte iti telepono iti dati a legal adviser-na a ni Salvador Panelo, kinunana a ti administrasion ni Presidente Ferdinand R. Marcos Jr. ti adda iti likudan dagiti ibagbaga ni Trillanes maipapan iti drug money a naideposito kadagiti bank account ti pamilia Duterte.

Nasional

Kiddaw ni Quiboloy a Medical Furlough, inanamongan ti Pasig RTC

Kinuna ni Duterte a “Malacañang-sponsored” ti dati a senador agsipud ta saan kano a makatignay daytoy a bukbukodna gapu ta agkurang iti pondona.

Itay Nob. 13, naipasango da Duterte, Trillanes, ken dati a senador Leila de Lima iti quad committee hearing kas resource persons.

Palpalutpoten ti komite ti nadara a gubat kontra droga nga inwayat ti administrasion ni Duterte a mapapati a nakapapatayan ti rinibribu a tao a kaaduanna ti marigrigat.

Insubli ni Trillanes ti siguden nga alegasionna nga umabot iti PhP2.4 a bilion ti naideposito iti bank accounts da Duterte ken Bise Presidente Sara Duterte manipud 2011 agingga 2015. Kinuna pay daytoy a ti 2016 campaign donor ni Duterte a ni Sammy Uy, a nainaig iti drug trade, ket nagideposito iti PhP 120-milion kadagitoy a bank account.

Nagpungtot ni Duterte gapu iti daytoy ket pinanggepna a bansagen iti mikropono ni Trillanes. Kinarit ti dati a senador a pirmaan ni Duterte ti maysa a bank waiver tapno masukimat dagiti nasao a bank accounts.

Kinuna ni Duterte a pirmaanna ti bank waiver iti sumaruno nga aldaw, Nob. 14, tapno mapaneknekan nga agul-ulbod ni Trillanes. Kinaritna pay ni Trillanes a pirmaanna ti bank waiver, iti maysa a kondision--tungpaenna iti publiko ti dati a senador. Immanamong met ni Trillanes nga agpatungpa.

Agingga ita, Nob. 18, awan pay insubmitar ni Duterte a napirmaan a bank waiver. (Raymund Antonio/MB)