Kalpasan ti nagsasaruno a pannakaipangina dagiti produkto ti lana, manamnama nga inton bigat, Martes, Nobiembre 19, 2024, maipalaka ti gasolina, diesel, ken gas (kerosene).
Maksayan iti P0.85 ti tunggal litro ti gasolina, ti diesel iti P0.75 ti tunggal litro, ken ti kerosene, iti P0.90 ti tunggal litro.
Sumagmamano a kompania, agraman ti Shell Pilipinas, PetroGazz, Clean Fuel, ken Seaoil, ti nangipakaammo iti pannakaibaba ti presio kalpasan ti pannakaipangato ti presio ti diesel ken kerosene idi napan a lawas.
Mainaig daytoy a panagbaba ti presio iti ibabassit ti panagkasapulan ti sangalubongan iti lana iti laksid ti limitado a suplay ti diesel ken gasolina manipud iti China.
Panagusar iti social media kadagiti pagbaludan, imparit ti BuCor
(PNA File Photo)
Inlawlawag ni Leo Bellas, presidente ti Jetti Petroleum, a ti bimmaba nga eksport ti China ti nangipasdek iti floor price ti gasolina.
Saan ketdi a dakkel ti lakaan dagiti oil products. Itay napan a lawas, manipud iti P60.15 agingga iti P65.63 ti tunggal litro ti presio ti gasolina iti Metro Manila, idinto a ti diesel ket agarup P57.25 agingga iti P65.70 ti tunggal litro.
Napaliiw ti Department of Energy (DOE) a ngimmato ti linawas a presio ti krudo ti Dubai iti $1.70 ti tunggal bariles, idinto a bimmaba ti balor ti pisos ti Filipinas iti P0.23 no idilig iti US dollar, a kimmapuy iti P58.49 manipud iti P58.26.
Iti laksid ti lumakaan bassit dagiti oil products ita a lawas, manamnama pay laeng ti ingangato ti presio ti lana gapu kadagiti agdama a mapaspasamak iti sangalubongan.
Idi Nobiembre 12, kinuna ti Capital Economics a mabalin nga ipatungpal ti president-elect Donald Trump ti Estados Unidos dagiti pannusana iti Iran. Idi 2018, naglusulos ti U.S. iti iti “nuclear deal” iti nagbaetan ti Iran ken ti United States, United Kingdom, France, Russia, China, ken Germany. Panggep ti katulagan a malimitaran ti programa a nuklear ti Iran a kas sukat ti nawaywaya a pannakinegosio ti Iran iti sangalubongan. Ngem imbabawi ti U.S. ti kaaddana iti katulagan ta atapenna a saan a solbaren ti katulagan ti ballistic missile program ti Iran ken dagiti aramid ti Iran iti aglawlawna. Ni Trump ti presidente ti U.S. idi 2018.
Patien dagiti analista a ti tension iti Iran, a mabalin a mangsinga iti sangalubongan a suplay ti lana, ket mabalin nga agtungpal iti nangatngato a presio ti gasolina iti masanguanan. Kuna ti Capital Economics nga adda dagiti imbestor nga agkuna met a makapadanag ti mabalin a panagibales ti dadduma a pagilian ken ti posibilidad a panangbangen ti Iran iti maysa a ruta dagiti barko nga agibibiahe iti lana, a mabalin a mangpangato pay iti presio ti lana. (Gabriell Christel Galang/ Manila Bulletin)
