Agdagup iti 295,576 a pamilia ti inapektaran ti tallo nga agsasaruno a napigsa a bagyo a limmabas iti Filipinas iti naglabas a lawas, segun iti National Disaster Risk Reduction and Management Council (NDRRMC).
Iti kaudian a pakaammo ti NDRRMC, agindeg iti 3,358 a barangay iti innem a rehion dagiti inapektaran da bagyo Nika (Toraji), Ofel (Usagi) ken Pepito (Man-yi).
Katukad daytoy a bilang ti 1,145,942 a katao manipud iti Region 1, 2, 3, Mimaropa, Region 5, ken ti Cordillera Administrative Region (CAR).
Agdagup iti 104,830 a pamilia (wenno 446,177 a katao) ti nagkamang kadagiti 2,717 a pagbakuitan, idinto a 66,681 a pamila (238,894 a katao) ti matultulongan iti ruar ti pagbakuitan.
Kiddaw ni Quiboloy a Medical Furlough, inanamongan ti Pasig RTC
Segun iti datos ti NDRRMC, nadadael ti 7,838 a balbalay manipud kadagiti Rehion 1,2,3, ken CAR gapu kadagiti tallo a bagyo.
Agarup PhP8,640,199.46 ti dadael ti agrikultura iti Rehion 1 ken 3.
Mapan met a PhP469,847,274.36 ti balor ti nadadael iti agrikultura iti Region 2, 3, ken iti CAR. (Priam Nepomuceno/PNA//Lito Hilidon/Bannawag)
