Pamigsaen pay laeng ti angin a yab-alat ni bagyo a "Pepito" iti sumagmamano a paset ti Luzon bayat ti panagpaamianan a laud daytoy nga agturong iti West Philippine Sea ita a Lunes, Nobiembre 18, segun iti Philippine Atmospheric, Geophysical and Astronomical Services Administration (PAGASA).
Iti inruar ti PAGASA a bulletin itay alas singko ti agsapa, addan ti sentro ni "Pepito" 145 kilometro iti laud ti Sinait, Ilocos Sur, ken addaan iti maximum sustained winds a 130 kph ken pugso nga umabot iti 160 kph.
Dinalapus ni "Pepito" idi kalman, Nob.17, ti adu a lugar iti Luzon a nakaibayogan pay ti Signal No. 5 kadagiti probinsia ti Aurora (Dipaculao, Baler, Dinalungan, Maria Aurora, Casiguran, San Luis), Quirino (Nagtipunan), ken Nueva Vizcaya (Alfonso Castañeda, Dupax del Norte, Dupax del Sur, Kasibu, Aritao, Bambang).
Sitatalinaed a nakabayog ti Signal No. 3 iti umamianan ken lumaud a paset ti Ilocos Sur (Gregorio del Pilar, Magsingal, San Esteban, Banayoyo, Burgos, Siudad ti Candon, Santa Lucia, Santiago, San Vicente, Santa Catalina, Lidlidda, Nagbukel, Sinait, Suyo, Sigay, San Ildefonso, Galimuyod, Siudad ti Vigan, San Emilio, Cabugao, Caoayan, San Juan, Santa, Bantay, Santo Domingo, Tagudin, Santa Cruz, Santa Maria, Narvacan, Salcedo), umamianan a laud a paset ti La Union (Luna, Bangar, Balaoan, Bacnotan), ken lamaud a paset ti Abra (San Quintin , Langiden, Pidigan, Pilar).
Resolusion ti UN nga agkidkiddaw ti ceasefire iti Gaza, saan a pinaboran ti Estados Unidos
Signal No. 2 iti Ilocos Norte, dadduma a paset ti Ilocos Sur, dadduma a paset ti La Union, Pangasinan, dadduma a paset ti Abra, lumaud a paset ti Mountain Province (Besao, Tadian, Sagada, Bauko), Benguet, ken umamianan paset ti Zambales (Santa Cruz, Candelaria).
Signal No. 1 met ti Apayao, Kalinga, dadduma a paset ti Mountain Province, Ifugao, akindaya a paset ti Cagayan (Lasam, Santo Niño, Solana, Enrile, Tuao, Piat, Rizal, Allacapan, Ballesteros, Abulug, Pamplona, Claveria, Santa Praxedes, Sanchez-Mira), Nueva Vizcaya, umamianan ken tengnga a paset ti Nueva Ecija (Bongabon, San Leonardo, Siudad Cabanatuan, Santa Rosa, Jaen, Cuyapo, Talavera, Santo Domingo, Rizal, Zaragoza, Llanera, Guimba, Aliaga, Pantabangan, Siudad de Ciencia de Muñoz, General Mamerto Natividad, Carranglan, Quezon, Ciudad de San Jose, Lupao, Nampicuan, Talugtug, Licab, San Antonio, Siudad ti Palayan, Laur), Tarlac, ken tengnga a paset ti Zambales (Botolan, Iba, Cabangan, Palauig, Masinloc).
Manamnama a rummuar ni Pepito iti Philippine area of responsibility (PAR) ita a a tengnga ti aldaw ti Nob. 18. (Ellalyn De Vera-Ruiz/MB)
