Inaprobaran ni Sekretaria ti Department of Budget and Management (DBM) Amenah F. Pangandaman ti pannakairuar ti PhP5 a bilion para iti programa ti ti Department of Social Welfare and Development (DSWD) a mangtulong kadagiti Filipino nga inapektaran dagiti bagyo.
Segun iti DBM, ti programa nga Assistance to Individuals in Crisis Situation (AICS) ket maitunos iti panggep ti administrasion ni Presidente Ferdinand Marcos Jr. tapno nadaras a maited dagiti kasapulan dagiti komunidad nga inapektaran ti didigra.
Ti AICS ti kangrunaan a serbisio ti DSWD a mangipaay iti tulong medikal, para iti natayan, transporastion, edukasion, ken pangtaraon, agraman ti pinansial a tulong kadagiti tao ken pamilia nga agkasapulan.
Maitunos ti nayon a pondo iti 2024 General Appropriations Act (GAA) a pannakausar ti Unprogrammed Appropriations (UA) a mangipalubos a mausar dagiti pondo para iti nasken nga impraestruktura wenno social program, agraman ti pinansial a tulong para kadagiti umili a basbassit ti matgedanda, no adda baro wenno nasurok a koleksion iti buis. (Derco Rosal/Manila Bulletin//Lito Hilidon/Bannawag)
