Insingasing ni Dip. Rufus Rodriguez ti 2nd District ti Cagayan de Oro City a rumbeng a biagen manen ti gobierno ti panangtuntonna iti panagtagikuana iti Sabah no ituloy ti Malaysia ti mangprotesta iti dua a pro-maritime security law a pinirmaan ni Pres. Ferdinand Bongbong Marcos Jr.
Para ken ni Rodriguez, awan ti nakaibatayan ti reklamo ti Malaysia iti panangipaulog ti presidente kadagiti dua a linteg.
Kinuna ti abogado a kongresista a nakaangkla ti reklamo ti Malaysia iti sumagmamano a reference material a naaramat iti pannabukel ti Philippine Maritime Zones Act ken ti Philippine Archipelagic Sea Lanes Law, a nakaisaadan ti panagtagikua ti Filipinas iti Sabah.
“Awan ti pagbatayan ti Malaysia iti protestana gapu ta saan a paset dagiti dua a linteg dagiti reference material a nadakamat. Saan a dinakamat dagitoy ti panagtagikua ti pagiliantayo iti Sabah,” kinuna ni Rodriguez, maysa kadagiti maresrespetar iti benneg ti linteg iti Kamara.
Gakat a mangipalubos nga agtrabaho dagiti Senior Citizen, inanamongan ti Kamara
“No nainget laeng ti panangprotesta ti Malaysia kadagiti lintegtayo kadagiti baro a maritime zone ken archipelagic sea lanes, isingasingko iti gobierno ti Filipinas nga ipingetna a biagen ti panagtagikuana iti Sabah—a nainkalintegan a kukua ti Filipinas babaen ti historic right wenno legal title,” innayon ni Rodriguez.
Dinakamatna ti maysa a nalatak a detalye iti pakasaritaan ti Filipinas, a naisursuro kadagiti pagadalan—ti tinawen a panagbayad ti Malaysia iti abang para iti Sabah kadagiti agtawid iti Sultanate of Sulu.
Kuna ‘toy diputado a taga-Mindanao a ti Maritime Zones Act ken ti Archipelagic Sea Lanes Law ket “mainaig laeng iti Exclusive Economic Zone-tayo, a na-compute 200-nautical miles manipud iti baseline-tayo, a saan a mairaman ti Sabah.
“Mainaig laeng dagiti baro a lintegtayo iti baybay kadagiti baybay a nanglikmut iti Filipinas. Awan pakaibianganda kadagiti teritoriona a kas iti Sabah,” kinunana.
Innayonna a maitunos iti United Nations Convention on the Law of the Sea (UNCLOS) ti pannakaipaulog dagiti dua a linteg.
Mainaig iti daytoy, dinayaw ni Rodriguez ni Presidente Marcos iti panangpirma daytoy kadagiti nadakamat a linteg.
(Ellson Quismorio)
