Aganay a PhP1-milion ti gunggona nga ited dagiti kongresman manipud iti dua a panel iti Kamara iti asino man a makaipaay iti impormasion maipapan iti kinasiasino ni "Mary Grace Piattos" a nagpirma iti maysa nga acknowledgement receipt a mainaig iti pannakausar ti confidential funds iti Office of the Vice President’s (OVP).
Segun ken ni Zambales 1st district Rep. Jefferson Khonghun, vice chairman ti good government panel, a nagboluntario dagiti kongresman a kameng ti Committee on Good Government and Public Accountability a mangpataud iti reward money tapno marisuten ti misterio ni "Mary Grace Piattos."
"Mangtedkami iti PhP 1 a milion iti asino man a makaibaga wenno makaited iti impormasion no asino ni Mary Grace Piattos, tapno matulongandakami a mangiparang kenkuana iti hearing," kinua nni Khonghun.
Madama nga im-imbestigaren ti nasao a komite ti mapapati a di maiparbeng a panagusar iti confidential funds ti OVP, kasta met ti Department of Education (DepEd) idi ni pay laeng Bise Presidente Sara Duterte ti sekretario.
'Due process,' naipakat iti pannakaibalud ni Lopez
Iti maysa a napalabas a hearing, timpuar ti nagan a "Mary Grace Piattos" kas nagpirma iti acknowledgement receipt a mainaig kadagiti dokumento nga insubmitir ti OVP iti Commission on Audit (COA).
Ni Antipolo City 2nd district Rep. Romeo Acop ti nakaduktal iti nagpirma nga agnagan iti Mary Grace Piattos.
Segun ken ni Acop, saan a nakapapati ti nagan a Mary Grace Piattos gapuna a mapagduaduaan met ti kinalehitimo ti gatad a nailanad iti resibo.
Kinuna met ni Khonghun a ti nagan (Mary Grace Piattos) ti nangpirma iti kadakkelan a gatad iti confidential funds ti OVP.
Iti social media, imparangarang met dagiti netizen a mabalin a naadaw ti “Mary Grace” iti nagan ti maysa a Filipino restaurant, idinto a ti “Piattos” ket lokal a brand ti potato chips.
Segun pay ken ni Khonghun, dida mamati a pudno nga adda Mary Grace Piattos, ngem ipappapilit latta ti OVP a pudno a tao ni Mary Grace Piattos.
No mapaneknekan a piksion laeng ti nasao a nagan, imbatad ni Khonghun a mabalin a kaipapanan daytoy a parparbo laeng met dagiti dadduma pay a nagpirma kadagiti dokumento. (Dexter Barro II/MB)
