Kinompirmar ti National Disaster Risk Reduction and Management Council (NDRRMC) ita nga aldaw, Nobiembre 19, a pito a tao ti natay iti Nueva Vizcaya gapu ken ni Bagyo Pepito, a nangsinga iti tarigagay ti gobierno a "zero casualty" iti laksid ti nagsasaruno a bagyo a nangdalapus iti pagilian.
Agarup PhP478 a milion ti nagtipon a balor ti nadadael iti agrikultura ken impraestruktura bayat a naideklarar ti state of calamity kadagiti 20 a lugar.
Nairaman ditoy ti innem nga ili ti Quirino Province (Aglipay, Cabarroguis, Diffun, Maddela, Nagtipunan, ken Saguday) ken dua iti Isabela (Santiago ken Cabagan) a paset amin ti Cagayan Valley (Region 2); ti ili ti Dilasag iti Aurora Province iti Central Luzon (Region 3); ti 10 nga ili iti Mountain Province (Barlig, Bauko, Besao, Bontoc, Natonin, Paracelis, Sabangan, Sadanga, Sagada, ken Tadian) agraman ti ili ti Aguinaldo iti Ifugao a paset amin ti Cordillera Administrative Region (CAR).
Iti sabali a bangir, pito a kameng ti sangkaamaan ti kompirmado a natay gapu iti panagregaay a pinataud ni Bagyo Pepito iti Ambaguio, Nueva Vizcaya idi Nob. 17, segun iti opisial ti Nueva Vizcaya Provincial Disaster Risk Reduction and Management a ni Khristian Sevilla.
Kiddaw ni Quiboloy a Medical Furlough, inanamongan ti Pasig RTC
Natay ti maysa a babai nga agtawen iti 18, lalaki nga agtawen iti 30, ken agtawen manipud 12 agingga 18 dagiti dadduma.
Agarup 5 agingga 6 a reggaay ti napasamak iti Ambaguio gapu iti nadalipespesen a daga a gapuanan dagiti nagsasaruno a bagyo iti Nueva Vizcaya -- manipud ken ni Kristine, Leon, Marce, Nika, Ofel, ket kaudian ni Pepito.
Segun ken ni Undersecretary ti Office of Civil Defense (OCD) Administrator Ariel Nepomuceno, addan 2.1 a milion a katao (568,000 a pamilia) ti inapektaran da Pepito, Nika ken Ofel iti Rehion 1 (Ilocos), 2 (Cagayan Valley), 3 (Central Luzon), Calabarzon (4A), Mimaropa (4B), Bicol (5), ken CAR.
Nasurok a 617,000 a katao ti adda pay laeng kadagiti 3,176 nga evacuation center. (Martin Sadongdong/Manila Bulletin//Lito Hilidon/Bannawag)
