Kalpasan ti nasurok a sangapulo a tawen, agsublin iti Filipinas ni Mary Jane Veloso, ti Overseas Filipino Worker (OFW) a nasentensiaan iti bitay iti Indonesia gapu iti kaso mainaig iti droga, segun ken ni Presidente Ferdinand Marcos Jr. (PBBM) ita, Nobiembre 20.
Babaen ti paskilna iti social media, nagyaman ni PBBM iti gobierno ti Indonesia gapu iti panangipalubos daytoy a makasubli ni Veloso iti Filipinas.
Kinuna ni PBBM a narikut ken atiddog ti naglasatan ti kaso ni Veloso, nga ibilangna a maysa laeng a biktima dagiti pasamak.
Kinuna ni Undersecretary ti Department of Foreign Affairs (DFA) a namnamaenda a makasublin ni Veloso iti Filipinas sakbay ti Paskua.
Kiddaw ni Quiboloy a Medical Furlough, inanamongan ti Pasig RTC
Segun iti Coordinating Ministry for Legal, Human Rights, Immigration and Correction ti Indonesia, ti "pannakayakar ti balud" ti maysa a pamuspusan tapno mapatgan ti kiddaw ti gobierno ti Filipinas. Nadakamat daytoy kalpasan ti panagpatang da Embahador ti Filipinas iti Jakarta Gina Alagon Jamoralin ken Coordinating Minister Yusril Ihza Mahendra mainaig iti pannakapakawan ni Veloso. Kayat a sawen ti "pannakayakar ti balud" ti pannakayakar ni Veloso manipud iti pagbaludan iti Indonesia sa maipan iti pagbaludan iti Filipinas.
Kinuna ni Yusril a salimetmetanda ti kinasoberania ti Indonesia ken ti pannakaipatungpal ti dusa kadagiti kriminal kas ipaulog dagiti korte. Ngem ti inaramid ita ti Indonesia mainaig iti kaso ni Veloso ket maysa a "constructive diplomacy" nga agpada a sursuroten dagiti dua a pagilian.
Kinuna ni Yusril nga ituloy latta ni Veloso nga ikaro ti natda a sentensiana iti Filipinas ken masapul nga agtulok kadagiti kondision nga impaulog ti korte ti Indonesia. Namnamaen ti Indonesia a bigbigen ti Filipinas ti pangngeddeng ti korteda ken maipatungpal latta koma ti sentensia nga impaulog ti Indonesia.
Adda ni Veloso iti death row ti Indonesia ket nasentensiaan a mapapatay babaen ti firing squad kalpasan a natiliwanda nga adda awitna a 2.6 a kilo a heroin iti eropuerto ti Indonesia idi 2010. Ngem kinuna ni Veloso a dina ammo ti mainaig iti kontrabando.
Idi Abril 2015, naipayaan ni Veloso iti last-minute reprieve kalpasan ti personal a panagkiddaw ni dati a presidente Benigno Aquino III ken ni dati a presidente ti Indonesia Joko Widodo iti ASEAN Summit iti Malaysia.
Intantan ti gobierno ti Indonesia ti pannakabitay ni Veloso kalpasan a simmuko dagiti recruiter-na iti autoridad iti Filipinas.
Idi Mayo 2023, kinuna ni Widodo nga ad-adalen manen ti gobierno ti Indonesia ti kaso ni Veloso. (Argyll Cyrus Geducos/Manila Bulletin//Lito Hilidon/Bannawag)
