Inaprobaran dagiti kameng ti Kamara iti maikatlo ken pinal a pannakaibasa ti linteg a mangipalubos kadagiti senior citizen a makapagtrabaho uray nagtengdan ti tawen ti panagretiro.
Nakaala iti 173 a botos ti House Bill (HB) No. 10985, wenno ti singasing nga Employment Opportunities for Senior Citizens and Private Entities’ Incentives Act iti plenario itay Nobiembre 19.
Segun ken ni House Speaker Martin Romualdez, ti panangted iti ad-adu a gundaway kadagiti senior citizen ket panangpabus-oy kadakuada a mangtagiragsak iti biagda, uray addadan iti maudi a tawenda.
Kinuna ni Romualdez a saan koma a mabaybay-an dagiti senior citizen nga agmaymaysa wenno agpannuray lattan iti binulan a pensionda, ket tiemponan a maipasigurado a maikkan iti automatiko a panggedan dagiti Filipino nga agtawen iti 60 ken agpangato, tapno agbalinda latta a produktibo nga umili.
PAGASA: Mabalin a 1 wenno 2 a bagyo, mabukel, sumrek iti PAR inton Disiembre
No agbalin a linteg, mandaran ti HB No. 10985 ti Department of Labor and Employment (DOLE), babaen ti Public Employment Service Offices (PESO), a mangipaay iti impormasion kadagiti panggedan a maitutop iti kabaelan dagiti senior citizen a kayatda ti agtrabaho.
Amin nga ahensia ti gobierno ken pribado a kompania ket mangiyusuat iti programa a mangipaay iti panggedan a mangitandudo iti pagimbagan dagiti senior citizen ken mangipasigurado a maikkan iti gundaway nga agtrabaho dagiti addaan iti kualipikasion, kapasidad, ken interes nga agtrabaho.
Dinakamat ti HB No. 10985 dagiti mabalin a panggedan dagiti senior citizen a pakairamanan ti trabaho a klerikal wenno sekretario, panagkonsulta, serbisio ti panagdalus wenno panangaywan iti balay, panangorganisar kadagit okasion, panangisuro, panangtulong iti kosina, panangtulong iti panaglako, ken dadduma pay a trabaho wenno panagboluntario.
Segun iti daytoy a gakat, maiparit kadagiti amin nga ahensia ti gobierno, agraman government-owned and controlled corporations (GOCCs), local government units (LGUs), ken para iti publiko nga ospital a singirenda dagiti dokumento a kasapulan dagiti agtrabaho a senior citizen kas iti birth certificate, police clearance, ken medical certificate. (Dexter Barro II/Manila Bulletin//Lito Hilidon/Bannawag)
