Inaprobaran ti Kamara, iti maikatlo ken maudi a pannakaibasana, ti gakat a mangkissay iti remittance fee dagiti Overseas Filipino Workers (OFWs).
Inanamongan dagiti 174 a kameng ti Kamara iti plenario itay Nobiembre 19 ti House Bill (HB) No. 10959, wenno ti gakat nga OFW Remittance Protection Act.
No agbalin a linteg, ti HB No.10959 ti mangipaay kadagiti OFW iti 50 a porsiento a diskuento kadagiti bayadanda ti remittance - iti banko man wenno saan a banko a pangipaw-itanda iti kuarta -- iti pamiliada iti Filipinas.
Agdagup iti nasurok a US$30 a bilion ti ipawpaw-it dagiti OFW iti Filipinas iti tinawen, maikapat a kadakkelan iti lubong, a sumaruno iti India, Mexico, ken China. Isu ti mangpatpatibker iti ekonomia ti Filipinas iti las-ud ti adun a dekada.
Kiddaw ni Quiboloy a Medical Furlough, inanamongan ti Pasig RTC
Maibatay iti HB No. 10959, maiparit kadagiti amin a banko ken saan a banko a pangipaw-itan iti kuarta, a mangingato kadagiti remittance fee no saanda a yuman iti Department of Finance (DOF), Department of Migrant Workers (DMW) ken iti BangkoSentral ng Pilipinas (BSP).
Nairaman iti HB No. 10959 dagiti maiparit nga aramid, ket madusa dagiti aglabsing babaen ti pannakaipupok manipud 6 a bulan agingga iti 6 a tawen, ken ti multa a PhP50,000 ngem saan a nasursurok iti PHP750,000. (Ellson Quismorio/Manila Bulletin//Lito Hilidon/Bannawag)
