Inaprobaran dagiti kameng ti Kamara itay Nobiembre 19, iti maikatlo ken maudi a pannakaibasana, ti House Bill (HB) No. 10914 wenno ti “Free OFW Financial Education Act," tapno masalakniban ken mapapigsa dagiti maibilang a bannuar iti moderno a panawen -- dagiti Overseas Filipino Workers (OFW).
Kinuna ni House Speaker Martin Romualdez a daytoy a linteg ti mangisigurado a dagiti OFW, agraman dagiti pamiliada, ket umawat iti libre a pannakaisuroda a mangimanehar iti kuartda a mangted kadakuada iti pannakaammo ken kadagiti kasapulanda tapno agbalin a natalged ti pinansial a masakbayanda.
Babaen ti obligado a panagsanayda mainaig iti financial literacy a mairaman iti pre-departure ken post-arrival seminar, kasta met dagiti online a rekursos para kadagiti pamilia ti OFW, mabukel ti sistema ti suporta a tumulong kadagiit OFW a mangpadakkel iti natgedanda ken mangsalaknib kadakuada iti financial scam.
Maikkan met iti pinansial nga edukasion dagiti pamili ti OFW babaen ti online a seminar ken dadduma pay a wagas.
Kiddaw ni Quiboloy a Medical Furlough, inanamongan ti Pasig RTC
Maibatay iti HB 10914, ti Department of Migrant Workers (DMW) ken dadduma pay nga ahensia ti gobierno ti madutokan a mangisuro kadagiti OFW ken dagiti pamiliada kadagiti nadumaduma a topiko kas iti pannakasalaknib dagiti konsiumer, pannakaisalda dagiti sanikua, pannakailiklik iti nalabes nga interes dagiti pautang wenno utang, ken panangipaay iti impormasion maipapan kadagiti babassit a negosio.
Maisuro met ti maipapan kadagiti obligasion ken kontrata, transaksion iti pautang, interes, prenda, salda, garantia, ken pannakaammo kadagiti maipanggep iti stock, bond, insurance, ken mutual fund. (Ellson Quismorio/Manila Bulletin//Lito Hilidon/Bannawag)
