Agtataripnong dagiti dadaulo ken pannakabagi ti depensa ti Southeast Asia iti Vientiane, Laos ita nga aldaw (Nobiembre 20), tapno pagpapatanganda ti maipapan iti seguridad, gapu ti kumarkaro a riri iti baybay iti China iti Asia-Pacific ken ti umadani a panagbaliw ti presidente ti Estados Unidos (US).
Naituding a dumar-ay ni Secretary of Defense ti US Lloyd Austin iti taripnong dagiti daulo ti depensa ti Association of Southeast Asian Nations iti Vientiane, idinto nga adu ti agsapsapul iti pammatalged sakbay ti panagsubli ti nabotosan a presidente a ni Donald Trump iti turay inton Enero, 2025.
Kagapgapu ni Austin iti Australia a nangileppas kadagiti pannakisaritana kadagiti opisial ken iti defense minister ti Japan, nga inkarida ti panangsuportarda iti ASEAN ken ti pakaseknanda kadagiti mangdadael iti kinatalged iti East ken South China Sea. agraman ti napeggad a tignay ti People’s Republic of China a maibusor iti Filipinas ken dadduma pay a barko ti sabali a pagilian.
Dumar-ay met iti taripnong ti Japan, South Korea, India, Australia ken China. (Associated Press/Manila Bulletin//Lito Hilidon/Bannawag)
