Inaprobaran ti Commission on Appointments (CA) ti pannakadutok ni dati a gobernador ti Cavite Juanito Victor “Jonvic” Remulla a kas Sekretario ti Department of Interior and Local Government (DILG) itay Nobiembre 20.
Nagpaay ni Remulla a kas gobernador ti Cavite manipud 2010 agingga 2016, ken idi 2019 agingga 2024. Nagpaay pay a bise gobernador ken provincial board member ti Cavite.
Agngayangay koma manen ni Remulla kas gobernador ti Cavite inton 2025 Election, ngem binabawina ti certificate of candidacy-na kalpasan ti innem nga aldaw a panangipilana, ket dinutokan ni Presidente Marcos a kas Sekretario ti DILG.
Ni Jonvic, a kabsat ni Crispin Remulla a Sekretario ti Hustisia, ti suno ti naglusulos a daulo ti DILG a ni Benhur Abalos gapu iti panagkandidatona a kas senador inton 2025 Election. (Dhel Nazario/Manila Bulletin//Lito Hilidon/Bannawag)
