Adda panggep ni Presidente Ferdinand Marcos Jr. (PBBM) nga agpatulong kadagiti nagturpos kadagiti State Universities and Colleges (SUCs) tapno mapaadu ti lokal a produksion dagiti bin-i a para iti agrikultura a saan ket nga agpannuray ti pagilian kadagiti imported a bin-i malaksid nga itunda daytoy a gannuat ti mangipaay iti naan-anay nga apit a para iti pagilian.
Daytoy ti kinuna ni PBBM iti maikawalo a taripnong ti Private Sector Advisory Council (PSAC) - Sektor ti Agrikultura a naangay iti Malakanyang ita nga aldaw, Nobiembre 21.
Kinuna ni PBBM a mabalin a dagiti mannalon ti mangtaripato iti idadakkel dagiti bin-i, ket dagiti agronomista ken agrikulturista a nagturpos kadagiti SUCs ti mangasikaso iti panangpataud kadagiti bin-i.
Indagadag ni PBBM kadagiti maseknan nga ahensia ti gobierno nga agpatulongda kadagiti SUCs iti panangiturongda kadagiti estudiante iti panagpataud kadagiti bin-i, ket kinunana a masapul nga ipamaysa dagiti SUCs ti research and development imbes a ti panagmula.
Kai Sotto, indauluanna ti panangatiw ti Gilas kadagiti Tall Blacks ti New Zealand
Maibatay daytoy iti singasing nga indatag ti maysa a kameng ti PSAC a ni Aileen Uygongco-Ongkauko ti La Filipina Uy Gongco Group a masapul a maparang-ay ti lokal a produksion dagiti bin-i dagiti amin a mula tapno agbalin a natalged ti suplay ti taraon iti pagilian.
Patien ni PBBM nga addaan iti teknikal a pagsiriban dagiti SUCs a mangpataud iti bukel, ket kasapulan a mapasayaat dagiti pagadalan iti agrikultura tapno yallatiwda ti panangpataud kadagiti bin-i manipud iti laboratorio agingga iti commercial level tapno masigurado ti kaadda daytoy iti merkado.
Kinuna ni daulo ti Commission on Higher Education (CHED) Prospero de Vera nga agarup 70 nga SUCs ti mangididiaya iti kurso nga agrikultura, 15 kadagitoy ti addaan iti pasilidad para iti panagpataud iti niog, idinto nga adda met dagiti saan a maus-usar a daga a mabalin a mausar a para iti panagpataud kadagiti bunubon. (Argyll Cyrus Geducos/Manila Bulletin//Lito Hilidon/Bannawag)
