Insingasing ni Presidente Daniel Ortega ti Nicaragua idi Nob.20 ti maysa a konstitusional a reporma a mamagbalin kenkuana ken ti baketna, ti agdama a Bise Presidente a ni Rosario Murillo, a kas “copresidents” ti pagilianda
Idinto a masapul nga aglasat ti nasao a singasing iti lehislatura ti Nicaragua, kontrolado met ti partido a Sandinista da Ortega ken Murillo ti kongreso ken amin nga institusion ti gobierno, isu a posible a maaprobaran daytoy.
Panggep pay ti singasing a yatiddog ti termino ti presidente iti innem a tawen (manipud iti dati a lima). Nangidatag ni Ortega iti sabali pay a bill idi Nob. 20 a mamagbalin nga ilegal ti asino man a mangipatungpal kadagiti sanction manipud iti Estados Unidos wenno dadduma pay a ganggannaet a pannakabagi “iti teritorio ti Nicaragua.”
Kinondenar met ti opisina ti secretary general ti Organization of American States (OAS) dagiti insingasing ni Ortega a konstitusional a reporma.
Resolusion ti UN nga agkidkiddaw ti ceasefire iti Gaza, saan a pinaboran ti Estados Unidos
"Saan a lehitimo ti ‘reporma’ iti porma ken linaonna, kaipapananna laeng ti saan a maiparbeng a porma ti institusionalisasion ti matrimonial a diktadoria iti dayta a pagilian iti Central America ken maysa a nalawag a panangatakar iti demokratiko a panagturay ti linteg,” kinunana ti OAS iti maysa a waragawag.
Impinget ni Ortega dagiti nasao a singasing kabayatan ti agtultuloy a pananglaplapped ti gobierno ni Ortega kadagiti protesta dagiti umili sipud pay idi 2018.
Kinemmeg ken imbalud ti gobierno ti Nicaragua dagiti bumusbusor iti gobierno, dagiti lider ti relihion, dagiti periodista, ken dadduma pay, sa kalpasanna indestierona ida, a nagresulta iti pannakaikkat ti ginasgasut a citizenship ken pannakaagaw dagiti sanikuada. Manipud idi 2018, linasang ti gobierno ti nasurok a 5,000 nga organisasion, a kaaduanna ket relihioso, ken kapilitan a nagpapanaw ti rinibu a tattao iti pagilian. (Associated Press)
