Saan nga inanamongan ti Estados Unidos (US) ti resolusion ti United Nations (UN) Security Council nga agkidkiddaw iti pannakaipasardeng ti gubat iti Gaza, gapu ta saan a dinakamat ti resolusion ti pannakaruk-at dagiti binalud dagiti rebelde a Hamas iti Israel idi Oktubre 2023.
Immanamong ti 14 kadagiti 15 a kameng ti United Nations Security Council (UNSC) ti resolusion, agraman dagiti kakadua ti US a Britain ken France, ngem imbasura ti US ti resolusion.
Kinuna ni Deputy Ambassador ti US Robert Wood a nagtrabaho ti US iti adu a lawas tapno maliklikan ti saan a pannakaanamong ti resolusion nga inisponsoran dagiti 10 a nabotosan a kameng ti UNSC, ngem ladingitenna ta dina paboran ti resolusion.
Kinuna ni Wood a nalawag ti impakaammoda bayat a maar-aramid ti negosiasion a dida anamongan ti awan kondisionna a ceasefire a napaay a mangwayawaya kadagiti hostage.
Segun ken ni Wood, ti resolusion a naidatag ti U.N. ket agkidkiddaw iti awan kondisionna, ken agnanayon a ceasefire a raemen dagiti amin a maseknan a partido, ket impaganetget ti resolusion ti awan kondisionna a pannakawayawaya dagiti hostage.
Finland, nagtalinaed a kararagsakan a pagilian, kuna ti World Happiness Report; dakes nga epekto ti social media kadagiti agkabannuag, naiparang
Impeksa ni Deputy Ambassador ti Palestine iti U.N. Majed Bamya ti pannakaupayna iti di pananganamong ti US iti resolusion, ken ti pannakapaay ti nabileg a UNSC nga agkiddaw iti pannakaigibus ti nasuroken a 13 a bulan a gubat, a nakapapatayanen ti 43,000 a Palestinian.
Ngem insungbat ni Ambassador ti Israel iti UN Danny Danon a ti resolusion ket saan a mangitunda iti kappia, no di ket mangiturong iti ad-adu pay a kinaranggas, ad-adu a panagsagaba, ken ad-adu a pannakaibukbok iti dara.
Iti laksid ti di pananganamong ti US iti resolusion, impaganetget dagiti nabotosan a kameng ti UNSC a masapul a magibusanen ti gubat iti Gaza iti kabiitan a panawen, ket masapul a mawayawayaan dagiti hostage nga awan ti kondision, ken mapalubosan dagiti tulong a sumrek iti Gaza, ken masapul a masalakniban dagiti sibilian ken dagiti pasdek a para iti sibilian.
Inkari met ni Embahador ti Algeria iti UN Amar Bendjama, a mangibagi iti Arab iti UNSC, nga agtataripnongto manen dagiti kameng ti konseho ket isayangkatda ti nabilbileg a resolusion maibatay iti Chapter 7 ti U.N. Charter, a mabalin a maipatungpal babaen ti militar - ken saanda a sumardeng agingga a saan nga agtignay ti konseho. (Associated Press/Manila Bulletin//Lito Hilidon/Bannawag)
