Nagkumit ti Filipinas ken Norway a sangsangkaymasa a papigsaenda ti panagtinnulongda a mangparmek iti seksual a panangabuso ken pananggundaway kadagiti ubbing iti online (online sexual abuse and exploitation of children wenno OSAEC) babaen ti panagbinninglayda iti napateg nga impormasion, ken dadduma pay a wagas.
Naaramid daytoy kalpasan a nabukel ti Memorandum of Understanding (MOU) iti nagbaetan ti National Bureau of Investigation (NBI) ken ti Norwegian police tapno mapabileg ti panagasmang ti dua a pagilian.
Segun iti Embahador ti Norway iti Manila, adun a pondo ti binusbos ti Norway police iti las-ud ti adu a tawenen a panagimbestigarda kadagiti Norwegian nga agorder iti live- stream a panagabuso ken ladladawan manipud iti Filipinas.
Bayat ti umad-adu ken kumarkaro a pangta ti OSAEC, napaliiw ti gobierno ti Norway nga agtultuloy latta a gundawayan dagiti naigamer iti OSAEC dagiti legal ken kriminal a pribado a serbisio tapno mailemmengda dagiti aramidda, lugar, impraestruktura ti operasion, ken kinasiasinoda babaen ti panagusarda iti nadumaduma a software ken data encryption tapno salaknibanda ti komunikasionda bayat nga agsagsagaba ti biktimada.
Pannakaiparit ti social media kadagiti ubbing nga awan pay 16 ti tawenna, naidatag iti Australia
Maibatay iti report nga inruar ti Norwegian National Criminal Investigation Service (NNCIS) idi Oktubre 2024, agarup 400 agingga 2,000 a Norwegian a lallaki ti nagala iti child abuse material idi napan a tawen, ket ti Filipinas ti kaykayatda a pangalaan kadagitoy.
Dayta ti gapuna a nagtignay ti daulo ti NNCIS a ni Kristin Kvigne tapno masalkniban dagiti ubbing a Filipino manipud kadagiti mananggundaway a Norwegian.
Kinuna ni Embahador ti Norway iti Manila Christian Halaas Lyster nga ipasingked ti MOU ti panagtinnulong ti Filipinas ken Norway a mangparmek iti OSAEC.
Mainayon ti MOU iti Nordic Liaison Office (NLO) a naipasdek iti Manila tapno maipamaysa dagiti kangrunaan a benneg ti kooperasion, kas iti pananglapped ken panangitandudo, panangidarum ken panangipatungpal iti linteg, panangsalaknib ken panangpasubli kadagiti ubbing, agraman pannakiasmang ken pannakikadua. (Joseph Pedrajas/Manila Bulletin//Lito Hilidon/Bannawag)
