Indatag ti Communications Minister ti Australia iti parlamento ti kaunaan a linteg iti lubong a mangiparit kadagiti ubbing nga awan pay 16 ti tawenna nga agusar iti social media, ket kinunana a ti kinatalged iti internet ti maysa a karigatan a parikut dagiti nagannak.
Segun iti singasing ni Michelle Rowland itay Nobiembre 21, agmulta ti agingga iti AU$33 a milion dagiti social media platform a TikTok, Facebook, Snapchat, Reddit, X (dati a Twitter), ken Instagram no agkapuyda a manglapped kadagiti ubbing a maaddaan iti bukodda nga account iti social media.
Kinuna ni Rowland nga aklonen ti kaaduan a masapul nga adda maaramid a linteg iti kabiitan a panawen, a manglapped iti pannakaisarang dagiti agtutubo a tin-edier ken ubbing kadagiti nakaad-adu nga impormasion a di nasagat ken awan patinggana.
Adu ti mangsupsuportar iti daytoy a gakat a no agbalin a linteg, maikkan iti maysa a tawen a panagsagana dagiti social media platform iti panangipatungpalda iti maiparit nga edad.
Kasano a labanan ti cyberthreat kadagiti pirate site?
Segun ken ni Rowland, panggep ti gakat a salakniban, saan ketdi a dusaen wenno iputong dagiti ubbing, ken panangiparikna kadagiti nagannak nga adda ti gobierno iti sibayda no maipapan iti panangitandudo iti salun-at ken pagimbagan dagiti annakda.
Inlawlawag ni Rowland a saan a maiparit dagiti ubbing nga agusar kadagiti messaging services ken online game wenno platform a makatulong iti salun-at ken panagadalda.
Malaksid iti pannakaiparit dagiti awan pay ti 16 a tawenna nga agusar iti social media, ad-adalen pay ti Australia no kasano a mailiklik dagiti ubbing nga awan pay ti 18 ti tawenna kadagiti online pornography. (Associated Press/Manila Bulletin//Lito Hilidon/Bannawag)
