Inwayat ni Kai Sotto ti kapintasanen nga ay-ayamna para iti national team idinto nga impaay ni Justin Brownlee ti umdas a tulong tapno iti kamaudiananna, maatiw met laengen ti Gilas Pilipinas ti New Zealand, iti isko a 93-89, iti 2025 FIBA Asia Cup qualifiers iti Mall of Asia Arena idi Huebes, Nobiembre 21.
Manipud iti panagiskor ken panag-rebound sa panagtapal ken panangtippay iti bola, agarup inaramid amin ni Sotto tapno idauluanna ti napintas nga ay-ayam ti Gilas iti naisangsangayan a third quarter run sa inleppas dagiti beterano ti Filipinas ti ay-ayam para iti umuna a balligi dagiti bumabasketbol ti pagilian kontra kadagiti Tall Blacks a maika-22 iti sangalubongan a ranggo iti tay-ak ti basketbol.
Nakaala ni Sotto iti 19 a puntos (career-high kas umaayam ti Gilas), 10 rebound, pito nga assist, dua nga steal ken dua a tapal. Addaan met da Brownlee iti 26 puntos, Scottie Thompson iti 12 puntos ken innem nga assist, ken sag-11 a puntos da Dwight Ramos ken Chris Newsome.
Saan laeng a ginibusan dagiti Filipino ti walo a tawen a pannakaat-atiwda kadagiti Kiwi no di pay immasidegda iti nasapa a pannakakualipikar iti kangrunaan a rikus iti FIBA Asia Cup a maangay iti Jeddah, Saudi Arabia inton umay a tawen. (AST | Karaman ti impormasion manipud ken ni Reynald Magallon ti Tempo)
