Pinatgan ti Pasig City Regional Trial Court (RTC) ita nga aldaw, Nobiembre 22, ti kiddaw ni daulo ti Kingdom of Jesus Christ (KOJC) Pastor Apollo Quiboloy a pannakailayon ti medical furlough wenno temporario a pannakawayawayana tapno agpaagas pay laeng agingga iti Nob. 27, gapu iti impeksion ti dental implants a nangapektar iti pangana.
Kinompirmar ti abogado ni Quiboloy a ni Israelito Torreon ti desision ti korte, ngem saan daytoy a nangted iti dadduma pay a detalye.
Naipupok ni Quiboloy iti Philippine National Police (PNP) Custodial Center iti Camp Crame, ngem naipan iti Philippine Heart Center idi Nobiembre 8 ta agalenna ti nasakit a barukongna idi Nob. 7.
Segun ken ni panakangiwat ti PNP Brig. Gen. Jean Fajardo, sinukimat dagiti doktor iti PNP General Hospital ni Quiboloy ket natakuatanda ti irregular a panagpitik ti pusona a mabalin a maibilang a pangta iti biagna.
Pakaisukatan ti Doliar iti Pisos iti Nobiembre 22, 2024
Naisubli ni Quiboloy iti PNP Custodial facility idi Nob. 16 ta saan a pinatgan ti korte ti kiddaw ni Quiboloy a hospital arrest.
Naidarum ni Quiboloy iti di mapiansaan a kaso a human trafficking segun iti Section 4(a) of Republic Act No. 9208, ken dagiti kaso segun iti Section 5(b) ken Section 10(a) ti Republic Act 7610 wenno ti Special Protection of Children Against Abuse, Exploitation, and Discrimination Act. (Patrick Garcia/Manila Bulletin//Lito Hilidon/Bannawag)
