Impaulogen ti Korte Suprema (SC) ti Implementing Rules and Regulations (IRR) a mangipatungpal iti Judiciary Marshals Act a mangipaay iti seguridad, kinatalged, ken salaknib kadagiti kameng, opisial, empleado, ken sanikua dagiti amin a korte iti entero a pagilian.
Babaen ti Republic Act No. 11691 a naipaulog idi 2022, ti Office of the Judiciary Marshals (OJM) to mangipaay iti seguridad ken salaknib iti integridad ti proseso iti amin a korte.
Agtignay ti OJM iti babaen ti direkta a panangiturong ken panangimaton ti SC, ket addaan iti karbengan nga agimbestigar kadagiti pangta, mangisayangkat iti nainkalintegan a panangaresto ken panangsakup, ken tumulong iti pannakaipatungpal dagiti pammilin ken proseso ti korte.
Adda met karbengan ti OJM nga agimbestigar kadagiti krimen a maibusor kadagiti kameng ti hudikatura, agraman dagiti alegasion ti graft and corruption iti sistema ti hustisia.
Kiddaw ni Quiboloy a Medical Furlough, inanamongan ti Pasig RTC
Adda karbengan ti OJM a mangipaulog iti subpoena, agkiddaw iti search warrant, mangtarawidwid iti panagsapata, ken makaala kadagiti public record manipud iti dadduma nga ahensia ti gobierno a maitunos iti Data Privacy Act.
Agbalinen nga epektibo ti IRR 15 nga aldaw kalapasan ti pannakaipablaakna iti Official Gazette wenno iti dua a nailian a pagwarnak. (Rey G. Panaligan/Manila Bulletin//Lito Hilidon/Bannawag)
