Impasigurado ni Presidente Ferdinand Marcos Jr. (PBBM) kadagiti inapektaran dagiti naglabas a bagyo iti Nueva Vizcaya nga agtultuloy ti panangtulong ti gobierno kadakuada agingga a makalung-awda.
Daytoy ti kinuna ni PBBM bayat ti panangyawatna ita nga aldaw, Nobiembre 22, iti PhP52 a milion a tulong pinansial ken 1,000 a kahon a family food packs kadagiti nabiktima da bagyo a Nika, Ofel, ken Pepito.
Iti panagbitlana, kinuna ni PBBM nga agtultuloy ti panangtedda iti relief goods agingga a saanen a kasapulan dagiti taga-Nueva Vizcaya ti ayuda.
Naggapu ti PhP50 a milion iti Office of the President (OP), idinto a PhP2.5 a milion ti naggapu iti Assistance to Individuals in Crisis Situation (AICS) a programa ti Department of Social Welfare and Development (DSWD).
Kiddaw ni Quiboloy a Medical Furlough, inanamongan ti Pasig RTC
Saan a nababbaba ngem it 500 a benepisiario ti naikkan iti PhP5,000 tunggal maysa babaen ti AICS.
Segun iti datos ti National Disaster Risk Reduction and Management Council (NDRRMC), agdagup iti 8,168 a pamilia (wenno 27,726 a katao) ti naapektaran iti nagtitipon nga epekto ti bagyo iti Nueva Vizcaya.
Pito ti natay, tallo ti nadangran gapu iti reggaay ken maysa ti mapukpukaw. Mapan a 2,824 dagiti balay a nadadael.
Innayon ti NDRRMC a 109 a pamilia (385 a katao) ti adda kadagiti 12 nga evacuation center, idinto a 66 a pamilia (wenno 282 a tao) ti adda kadagiti temporary shelter iti ruar dagiti evacuation center iti probinsia.
Agdagup iti 77 a kalsada ken 32 a rangtay ti nadadael iti Nueva Vizcaya gapu kadagiti bagyo a nabiit pay a limmabas.
Binilin ni PBBM ti Department of Public Works and Highways (DPWH) nga ipangrunada ti pannakatarimaan ti Bambang Bypass Road iti Nueva Vizcaya kalpasan a madadael daytoy gapu ken ni Bagyo Pepito. (Argyll Cyrus Geducos/Manila Bulletin//Lito Hilidon/Bannawag)
