Kinompiskar dagiti kameng ti anti-narcotics a grupo ti Philippine National Police (PNP) ti agarup PhP7.6 a milion a balor ti marihuana iti panangrautda iti plantasion iti ili ti Tinglayan iti Kalinga itay Biernes, Nobiembre 22.
Segun ken ni direktor ti PNP Drug Enforcement Group (PDEG) Brig. Gen. Eleazar Matta, rinautda ti pagmulmulaan ti marihuana maibatay iti napatalgedanda a report maipapan iti maysa a lugar iti Barangay Buscalan a pagmulmulaan iti marihuana.
Kaduada dagiti lokal a polis, rinaut dagiti operatiba ti PDEG ti lugar, ket natakuatanda dagiti dadakkelen a marihuana iti agarup 3,800 a metro kuadrado a daga.
Kinuna ni Matta nga innala dagiti kameng ti PDEG dagiti 38,000 a puon ti dakkelen a marihuana nga agbalor iti agarup PhP7.6 a milion.
Australiano, 2 pay, natiliw gapu iti bogus a doliar
Nupay kasta, saanda a nakemmeg ti asino man a mangtartaripato kadagiti marihuana ngem kalpasan ti panagimbestigarda, mabigbigdanto no asino dagiti mangpatpataray iti plantasion.
Kinuna ni Matta a pinuoranda dagiti marihuana iti mismo a lugar a nakaimulaanda, ket naispreyan iti herbicide tapno malapdan ti posible a panagtuboda manen. (Aaron Recuenco/Manila Bulletin//Lito Hilidon/Bannawag)
