Ibilang ti Malakanyang a serioso a banag ti pangta ni Bise Presidente (BP) Sara Duterte iti biag da Presidente Ferdinand R. Marcos Jr. ken First Lady Liza Araneta-Marcos, segun iti Presidential Communications Office (PCO) ita nga aldaw, Nobiembre 23.
Kinuna ti PCO nga inyumanen ni Executive Secretary Lucas Bersamin iti Presidential Security Command (PSC) daytoy a banag tapno aramidenda ti maitutop nga aksion mainaig iti mapapati a bilin a panangpapatay iti First Couple.
Segun iti PCO, saan a pagang-angawan ti seguridad ti Presidente, nangruna ta nabatad ti pannakaipalgak daytoy iti publiko.
Iti maysa nga online press briefing itay agsapa ti Sabado (Nob. 23), imbaga ni BP Duterte nga adda nabilinnan a mangpapatay ken ni Marcos ken iti First Lady no adda mangpapatay kenkuana.
Australiano, 2 pay, natiliw gapu iti bogus a doliar
Kinuna ni Duterte a "saan nga ang-angaw" ti panangbilinna iti kinontratana a mangpapatay iti First Couple ken ni House Speaker Martin Romualdez.
Iti sabali pay a virtual press conference ni Duterte, nga agdagdagus ita iti opisina ni kabsatna a Diputado Paolo Duterte iti Kamara, a ni Romualdez laeng ti addaan iti panggep a mangpapatay kenkuana.
Insayangkat ni BP Duterte ti press briefing kalpasan ti pammilin ti House Committee on Good Government and Public Accountability a mayakar ti chief of staff ni BP Duterte a ni Undersecretary Zuleika Lopez, manipud iti pagpupokan ti Kamara agturong iti Women’s Correctional Facility iti Mandaluyong City.
Idi Mierkoles, nai-cite for contempt ni Lopez gapu iti "undue interference" iti panagimbestigar ti House Committee on Good Government and Public Accountability iti panagusar ti confidential fund ti Office of the Vice President. (Ruth Abbey Gita-Carlos/PNA//Lito Hilidon/Bannawag)
