Impaganetget ti Department of Social Welfare and Development (DSWD) ti kiddawna iti publiko a liklikanda koma ti mangted iti limos kadagiti ubbing, awanan pagtaengan, ken Indigenous People (IP) nga agpalpalama iti kalsada, ngem impatalgedna ti responsable a panagtulong, nangruna iti panawen ti Paskua a dumakdakkel ti bilang dagiti agpalpalimos.
Kinuna ni pannakangiwat ti DSWD Assistant Secretary Irene Dumlao itay Nobiembre 21 a saan a panggep ti ahensia a dadaelen ti anag ti Paskua, ngem masapul ti manakman a wagas ti panangted iti tulong babaen ti panangsarungkar kadakuada, panangikkat kadakuada iti kalsada, ken panangsalaknib kadakuada manipud kadagiti peggad a sarangtenda.
Maitunos daytoy iti Presidential Decree No. 1563, wenno iti Anti-Mendicancy Law, a mangiparit iti panaglimos ken panagdawat iti donasion ti maysa a tao wenno gunglo kadagiti kalkalsada.
Imbes a suportaran ti panagpalama, indagadag ni Dumlao iti publiko nga idiayada ti dadduma a kita ti tulong a kas iti panangisayangkat iti organisado a panangted iti sagut, panagpakan, medikal a mision, panagistoria (story telling para kadagiti ubbing), ken panagkaroling a maitunos iti pagannurotan ti maseknan a gobierno lokal.
Australiano, 2 pay, natiliw gapu iti bogus a doliar
Iti sabali a bangir, binalakadan ni Dumlao dagiti gunglo wenno grupo nga agpanggep nga agur-or iti pondo babaen ti panagkaroling a mangalada iti solicitation permit iti DSWD no rehion wenno nailian ti sakupda. Ngem kadagiti agpatingga laeng iti barangay, siudad, wenno ili, mangala iti pammalubos manipud iti maseknan nga LGU.
Ti solicitation permit nga ipaulog ti DSWD ken LGU ti mangted iti karbengan kadagiti tao wenno grupo a dumawat iti donasion wenno boluntario a tulong para kadagiti programa a pagsayaatan ti publiko, tapno maliklikan ti ilegal a panagurnong iti pondo a mangabuso kadagiti agdonar. (Ellalyn De Vera-Ruiz/Manila Bulletin//Lito Hilidon/Bannawag)
