Agarup 1,000 a balay ti nadadael ken 2,000 a pamilia ti naawanan iti pagtaengan gapu iti dakkel nga uram iti Isla Puting Bato iti Tondo, Manila idi kalman, Nobiembre 24.
Segun iti Bureau of Fire Protection (BFP), dimmanon iti umuna nga alarma idi 8:02 iti bigat ken dagus a naipangato iti maikadua ng alarma kalpasan ti 3 a minuto, iti 8:05 iti bigat.
Kinuna dagiti bombero nga agkurkurang ti danum isu nga imbayogda iti maikatlo ken maikapat nga alarma iti 8:16 iti bigat.
Idi agangay, naipangato ti alarma iti iti Task Force Alpha iti 9:02 iti bigat ken iti ken Task Force Bravo iti 10:13 iti bigat.
Pakaisukatan ti Doliar iti Pisos iti Nobiembre 25, 2024
Iti alas 11:55 iti bigat nagbalinen a Task Force Charlie ti alarma. Naiddep ti apuy idi 4:07 iti malem.
Saan a nababbaba ngem iti 71 a bombero, uppat a fire boat, ken tallo nga ambulansia ti nagresponde iti uram.
Tallo a helikopter ti Philippine Air Force nga addaan iti helibucket ti timmulong kadagiti bombero a mangiddep iti uram.
Segun kadagiti nagresponde, dagiti balay a naapektaran ket naaramid iti nalaka a mauram a materiales.
Timmulong dagiti kameng ti Coast Guard Station (CGS) Manila, CGS Malacañang, ken Special Operations Unit (SOU) - Malacañang a mangiddep iti uram ken iti rescue operations a naglugan iti dua a fire boat.
Sinaranay dagiti dadduma pay nga ahensia ti gobierno kas iti Department of Social Welfare and Development (DSWD) ken ti Philippine Red Cross (PRC) dagiti pamilia nga inapektaran ti uram. (Diann Ivy C. Calucin/Manila Bulletin//Lito Hilidon/Bannawag)
