Kas kadagiti naglabas a panagbiahena, dinutokan manen ni Presidente Ferdinand Marcos Jr. (PBBM) dagiti tallo a kameng ti gabinetena a mangaywan iti gobierno bayat ti kaaddaana iti United Arab Emirates (UAE) inton Martes, Nobiembre 26.
Segun iti Presidential Communications Office (PCO), da Executive Secretary Lucas Bersamin, Sekretario ti Department of Justice (DOJ) Jesus Crispin Remulla, ken Sekretario ti Department of Agrarian Reform (DAR) Conrado Estrella III dagiti napusgan a kameng ti "caretaker committee" bayat ti kaadda ni PBBM iti ballasiw-taaw.
Iti kallabes, impakaammo ti PCO a mapan ni PBBM iti UAE para iti maysa aldaw a panangsarungkar tapno mapatibker ti panaggayyem ti Filipinas ken UAE.
Makasarita ni PBBM ti Presidente ti UAE a ni Sheikh Mohamed bin Zayed Al Nahyan iti Abu Dhabi inton Martes iti malem. (Betheena Unite/Manila Bulletin//Lito Hilidon/Bannawag)
