Inkalam-it ni Bise Presidente Sara Duterte ti pamilia Marcos iti pannakapapatay idi ni dati a senador Benigno "Ninoy" Aquino Jr. kas sungbatna iti pakaammo ni Presidente Ferdinand Marcos Jr. maipapan kenkuana idi malem ti Lunes, Nobiembre 25.
Iti pananginterbiu dagiti reporter ti House of Representatives, dinamagda ken ni Duterte ti makunana iti daytoy a kinunana ni Marcos:
''Kung ganun na lang kadali ang pagplano sa pagpatay ng isang Presidente, papaano pa kaya ang mga pangkaraniwan na mamamayan?”
(No kasta ti kinalakana ti agplano iti pannakapapatay ti maysa a Presidente, kasano pay ngata ti gagangay nga umili?”)
Pakaisukatan ti Doliar iti Pisos iti Nobiembre 25, 2024
Innayon ni Marcos a saanna a mapalabes dagiti kakastoy a kriminal a gandat.
Gapu iti daytoy, kinuna ti Bise Presidente, a malasin a makapungtot: "Di ba pumalag nga yung buong bayan nung pinatay ng pamilya nila si Benigno Aquino Jr.?"
(Saan kadi a limmaban ti sibubukel a pagilian idi pinatay ti pamiliada ni Benigno Aquino Jr.?)
Ni Senador Aquino ti karibal idi iti politika ni Presidente Ferdinand Marcos Sr., ti pimmusayen nga ama ni BBM.
Ti pannakapapatay ni Aquino idi Agosto 21, 1983 ti maitudo a nakaigapuan ti pannakapaksiat ti presidente idi a ni Marcos Sr., kalpasan ti tallo a tawen. Ngem saan a pulos a napaneknekan nga adda pannakainaigna iti pannakapapatay ni Ninoy.
Tinabunuan ni Bise Presidente Duterte idi Lunes ti maikapito a hearing ti House Committee on Good Government and Public Accountability, a mangim-imbestigar iti mapapati a di umisu ti pannakausarna a P612.5 milion a confidential ken intelligence fund-na. Nagpa-interbiu ni Duterte bayat ti break iti hearing.
(Ellson Quismorio/Manila Bulletin)
