Impetteng dagiti daulo ti Kamara a naipakat ti umno a proseso ken kalintegan ti Chief of Staff ti Office of the Vice President (OVP) a ni Zuleika Lopez, kasungani iti ibagbaga ti kampo ni Bise Presidente (BP) Sara Duterte.
Binabalaw ni House Majority Leader ken Diputado ti Zamboanga 2nd district Mannix Dalipe ni Duterte ken dagiti pasurotna gapu iti panagkunada a panangballikogda iti kinapudno.
Kinuestionar ni Dalipe ti insawang ti kampo ni Duterte a maiparit kadagiti abogado ti sumarungkar ken ni Lopez bayat ti pannakaibaludna iti pagpupokan ti Kamara.
Naipupok ni Lopez iti sidong ti Kamara gapu ta nai-cite for contempt daytoy iti panagimbestigar ti Kamara iti mapapati a di umno a pannakausar iti PhP612.5 a milion a pondo ni Duterte.
2,000 a pamilia, naapektaran iti uram iti Isla Puting Bato
Naibilin a mayakar ni Lopez iti Correctional Institute for Women (CIW) iti Siudad ti Mandaluyong, gapu iti pananglabsing ni Duterte iti seguridad iti Kamara. Ngem nayallatiw ni Lopez iti Veterans Memorial Medical Center (VMMC) gapu iti parikut iti salun-atna.
Kinuna ni House Assistant Majority Leader a Diputado ti Zambales 1st district Jay Khonghun a nanakman ken napnuan asi ti tignay ti Kamara, ket ni BP Duterte ti masapul nga agpalawag kadagiti inaramidna, agraman ti pananglappedna iti hustisia ken panangpolitikana iti daytoy a banag. (Dexter Barro II/Manila Bulletin//Lito Hilidon/Bannawag)
