Naka-red alert ita ti Presidential Security Command (PSC) kalpasan ti pangta iti seguridad da Presidente Ferdinand E. Marcos Jr. ken First Lady Liza Araneta-Marcos.
Daytoy ti impalgak ti PSC ita a Lunes, Nob. 25, iti panangipatungpalda iti naing-inget a pannakaiwayat ti seguridad iti ikub ti Malakanyang, a saggaysa a masukimat dagiti lugan a sumrek iti Palasio.
Segun ken ni Major Nestor Endozo, PSC civil military operations officer, naipaulog ti bilin manipud iti komander ti PSC idi Sabado, Nob. 23 a pannakadoble ti seguridad ti Presidente kadagiti masungad nga aktibidadna iti publiko.
Idinto a di impalgak ni Endozo no adda adjustment iti security protocol ni Marcos, kinunana a maipangruna ti koordinasion ken deployment dagiti security personnel.
'Due process,' naipakat iti pannakaibalud ni Lopez
Idinto a madoble ti seguridad ni Marcos, awan pay laeng ti direktiba a manglimitar iti aktibidad ti Presidente.
Awan pay ti instruksion manipud iti komander ti PSC no mangipanda iti bulletproof glass iti podium ti Presidente kadagiti pannakitaripnongna iti publiko. Awan pay met ti bilin no kasapulan nga agisuot ti Presidente iti bulletproof vest kadagiti aktibidadna.
Naiwayat ti pannakainget ti seguridad iti Malakanyang ken ti pannakadoble ti seguridad ti Presidente kalpasan nga impangta ni Bise Presidente Sara Duterte a mapapatay da Marcos, ti First Lady, ken House Speaker Martin Romualdez no, segun ken ni Duterte, mapapatay isuna. Imbatadna nga addan pinusganna a nakasagana nga assasin a mangpapatay met kada Marcos no mapasamak ti kunana a mabalin a pannakapapatayna.
Nupay kasta, imbuelta ni Duterte ti statement-na ket kinunana nga awan ti magun-odna no mapapatay ti Presidente. Kinuna ni Duterte nga ad-adda a pakaseknan ti statement-na ti pangta iti bukodna a seguridad. (Betheena Unite/MB)
