Imbatad dagiti kongresman manipud iti mayoria ken minoria ti Kamara nga awan kinaagpaysuananna ti ibagbaga ni Bise Presidente Sara Duterte a ni House Speaker Martin Romualdez ti akinnakem iti pannakaim-imbestigar ti confidential and intelligence funds (CIF) ti Office of the Vice President (OVP) ken Department of Education (DepEd).
Imbatad ni Duterte nga ar-aramiden daytoy ni Romualdez gapu iti mapapati a plano daytoy nga agkandidato a presidente.
Kinuna ni House Majority Leader Zamboanga City 2nd district Rep. Manuel Jose "Mannix" Dalipe nga awan a pulos pagbatbatayan ti imbaga ni Duterte. Innayonna a kayat laeng ti Kamara a salakniban ti pondo ti publiko isu a nagtignayda iti report ti Commission on Audit (COA) a nangkuestionar iti ginasut a milion a pisos a nabusbos iti CIF ni Duterte kas bise presidente ken kas sekretario ti DepEd.
Segun ken ni Dalipe, nainkalintegan ti pannakairuar ti congressional inquiry mainaig iti mapapati a di umisu a panangusar ti OVP iti CIF.
4 a vlogger, naidarum gapu iti panang-'fake news' iti statement ni NBI Director Santiago
Napaliiw ni Dalipe a saan a pinalubosan ti COA ti PhP73 a milion iti PhP125 milion a CIF a ginastos ti OVP iti las-ud ti 11 nga aldaw laeng idi Disiembre 2022.
Nakita pay ti COA ti nasurok a PhP160 a milion manipud iti PhP325 a milion a nairuar iti umuna a tallo a kuarter ti 2023.
Immuna nga inruar ti Makabayan bloc ti Kamara ti maipapan iti mapapati a di umisu a pannakausar ti CIF nga agdagup iti PhP125 a milion. Nagbalin a napudot a damag daytoy, agingga a naisaang daytoy iti imbestigasion ti House Committee on Good Government and Public Accountability.
Kinuna ni House Deputy Minority Leader ACT Teachers Party-list Rep. France Castro, kabayatan ti hearing ti good government panel idi Nob. 20 a saan a nakikumplot ti Makabayan ken ni Speaker Romualdez.
"Awan ti pakainaigan ti Speaker no apay nga imbutaktakmi ti isyu ti confidential funds," kinuna ni Castro. "Mabalin a pampanunoten ti Bise Presidente a depdepensaanmi manen ti Speaker. Awan ti kasta."
Kinuna ni Castro nga imbutaktak ti militant bloc ti isyu gapu ta nakitada ti notice of disallowance ti COA ken patienda a masapul a maikkat amin a CIF.
"Ditoy Kongreso, uray agduduma ti pagtaktakderanmi, respetuenmi ti pammati a politikal ti tunggal maysa," innayon ni Castro. (Ellson Quismorio/MB)
