CAMP DANGWA, Benguet.—Duapulo ket uppat (24), a pakairamanan ti pito a most wanted, ti natiliw kadagiti insayangkat ti polisia a manhunt operations iti Cordillera Region manipud Nobiembre 17 agingga iti Nobiembre 23.
Segun iti Police Regional Office-Cordillera Regional Investigation and Detective Management, 12 a wanted ti inarestar ti Baguio City Police Office, 4 iti Ifugao Police Provincial Office, 3 iti Benguet PPO, 2 iti Abra PPO, ken saggaysa iti Apayao PPO, Kalinga PPO, ken Mountain Province PPO.
Lima kadagiti natiliw ti wanted iti provincial level idinto a dua iti municipal level.
Nadumaduma ti kaso a sangsanguen dagiti suspek, kas iti panagrames, panagikut iti ilegal a droga, lascivious conduct, statutory rape, ken murder.
Awan krimen a nairekord iti 61 a munisipalidad iti rehion iti daytoy a lawas: 24 a munisipio iti Abra, 10 iti Mountain Province, 9 iti Benguet, 8 iti Ifugao, 6 iti Apayao, ken 4 iti Kalinga. Awan met krimen a nairekord iti Police Stations 1, 2, 3, 4, 5, 7, 8, ken 10 iti Baguio City Police Office.
Excise tax iti krudo, gasolina, saan a nasuspenso
Kabayatanna, nakakompiskar dagiti polis iti shabu ken marihuana nga aggatad iti P19.8 milion ken nakatiliwda iti uppat a maatap a drug pusher iti Cordillera region manipud Nobiembre 18 agingga iti Nobiembre 24.
Kinuna ni Brig. Gen. David Peredo Jr., hepe ti PRO-Cordillera, a nangisayangkatda iti 14 nga anti-illegal drug operation ket nakakompiskarda iti 48,870 a dadakkelen a mula a marihuana; 12,000 a patubo (seedlings) a marihuana; 80,000 a gramo ti nagango a bulong ken agbungbunga a rangaw ti marihuana; ken 5.20 a gramo ti maatap a shabu .
Uppat a drug pusher ti naaresto—dua a high-value individuals sadiay Kalinga ken Mountain Province ken dua nga street-level individuals sadiay Baguio City ken Kalinga.
Natiliw met ti maysa a 51-anyos nga empleado ti gobierno bayat ti naisayangkat a raid sadiay Barangay Lenneng, Kabugao, Apayao idi Nobiembre 25.
Naala ti polisia iti ikut ti suspek ti 0.5 gramo ti shabu nga agpateg iti P3,400 ken drug paraphernalia.
(Zaldy Comanda/Manila Bulletin)
