Nagdonar ti Department of Environment and Natural Resources (DENR) iti nasurok a 78,000 board feet a tabla nga aggatad iti P4.6 million tapno makatulong iti pannakabangon manen dagiti nadadael a pagtaengan ken pagadalan iti probinsia ti Batanes ken Cagayan.
Iti maysa a pakaammo idi Martes, Nobiembre 26, kinuna ti ahensia a nakaawat ti Batanes iti 4,791 a pedaso ti table, nga agdagup iti 63,260.62 board feet, para iti pannakatarimaan ken pannakabangon manen dagiti pagtaengan dagiti nadidigra ti bagyo kadagiti munisipalidad ti Basco, Itbayat, Ivana, Mahatao, Sabtang, ken Uyugan.
Naiwaras dagiti materiales tapno matulongan dagiti umili a makabangon manipud iti didigra nga inyeg ni Bagyo Julian, nailanad iti pakaammo.
Idiay Cagayan, kinuna ti DENR a naikkan ti Department of Education (DepEd) iti nasurok a 1,000 a pedaso ti tabla, nga agdagup iti 14,879.92 board feet, tapno matarimaan dagiti pagadalan iti Second District a dinadael ni Bagyo Marce.
US Marine, nalmes iti Ilocos Norte
Segun ken ni Gwendolyn Bambalan, regional executive director ti DENR Region 2, naggapu dagiti tabla manipud kadagiti nakumpiskar a forest products nga addaanen iti Order of Finality nga adda iti kustodia ti ahensia iti Cagayan, Isabela, Quirino, ken Nueva Vizcaya, kasta met kadagiti naipaima iti ahensia a tarikayo manipud kadagiti kompania ti panagminas idiay Nueva Vizcaya.
Dinayaw ni Environment Secretary Maria Antonia “Tonio” Yulo-Loyzaga ti nasao a gannuat, a kunana a mangipakita iti kinapateg ti panagtutunos para iti ilulung-aw manipud iti didigra.
“Iti laksid dagiti karit a pinataud dagiti agsasaruno a bagyo, nabalinanmi a pinagtignay dagiti rekursosmi ket nakitinnulongkami kadagiti partners-mi tapno maipaaymi ti kasapulan unay a tulong para kadagiti biktima ti bagyo,” kinunana.
Dagiti kakastoy nga aramid, segun iti DENR, masapul ti panagtitinnulong ti Office of Civil Defense, Philippine Navy and Air Force, ken ti Philippine National Police.
Binigbig met ni Bambalan ti suporta nga impaay dagiti pannakabagi ti linteg ken emergency services kas iti Police Mobile Force Company, Police Provincial Office, ken ti Bureau of Fire Protection kabayatan ti pannakaideliber dagiti tulong.
(Jel Santos/Manila Bulletin)
