Imbatad ti Armed Forces of the Philippines (AFP) a saan a pudno nga adda dagiti soldado nga agtigtignay a mangsalaknib ken ni Bise Presidente Sara Duterte gapu iti nabiit pay a panagpangtana maibusor iti Commander-in-Chief a ni Presidente Ferdinand Marcos Jr.
Adda paskil a naiwaras iti social media nga agkunkuna a "Pro-Duterte" ti AFP, ken adda pay nagkuna nga agsagsaganan dagiti soldado iti Davao a mapan iti Manila tapno "salaknibanda ti Bise Presidente." Nausar iti paskil dagiti ladawan ken video a mangipakpakita iti panagtignay dagiti soldado ken dagiti alikamen ti militar.
Segun ken ni pannakangiwat ti AFP Col. Francel Margareth Padilla itay Lunes, Nobiembre 25, "parbo" ken "makaallilaw" dagitoy nga impormasion a maiwarwaras iti nadumaduma a social media platform.
Kinuna ni Padilla a saan a mapagtalkan ti nagtaudan dagitoy nga impormasion, ken saan a suportaran ti asino man nga opisial ti AFP, idinto a nairanta dagitoy a mangpataud iti di kasapulan a panagbuteng ken pannakatikaw.
Kampania kontra pannakamanipular ti presio ti bagas, isayangkat ti DA
Inlawlawag ni Padilla nga awan ti kastoy nga ar-aramiden ti AFP, ta dagiti ladawan ken video a nadakamat iti paskil ket ala kadagiti napalabas nga operasionda, ket pinagparangda a kas agdama a mapaspasamak tapno mangallilaw.
Iti sabali a bangir, nagtalinaed a sititibker ti National Security Council (NSC) iti takderna a maibilang a "national security" ti pangta ti Bise Presidente a mangpapatay ken ni Presidente Marcos Jr., agsipud ta pagpeggadenna ti kinatalged ti gobierno ti pagilian.
Kinuna ti panakangiwat ti NSC a ni Jonathan Malaya, masapul nga urayen ni BP Duterte ti resulta ti panagimbestigar dagiti autoridad no ania dagiti nasken a sungsungbatanna. (Martin Sadongdong/Manila Bulletin//Lito Hilidon/Bannawag)
